Qazaqstanda elektr samokattarynyń jyldamdyǵyna qatysty shekteý engiziledi
NUR-SULTAN. QazAqparat – Qazaqstanda elektr samokattardy paıdalanýdyń ulttyq standartynyń jobasy ázirlendi. Bul týraly «AgromashHoldıng KZ» AQ bazasyndaǵy «Dońǵalaqty kólik quraldary jáne aýyl sharýashylyǵy mashınalary» standarttaý jónindegi №87 tehnıkalyq komıtetiniń tóraǵasy Erbol Seıpılov málim etti, dep habarlaıdy QazAqparat tilshisi.
«Bul joba halyqaralyq standart negizinde jasaldy. Osy standarttyń aıasyna jyldamdyǵy saǵatyna 25 shaqyrymnan aspaıtyn elektr samokattary kiredi. Sondyqtan osy sıpattaǵy elektr samokattary velosıped joldarymen jáne jaıaý júrginshiler jolaǵymen de júre alady. Sonymen qatar, avtomobıl jolynyń shetimen júrgen kezde qozǵalystaǵy basqa kólikterge kedergi keltirmeýi kerek. Osy oraıda tıisti qaýipsizdik erejelerin saqtaýy tıis», - dedi E.Seıpılov elordada ótken baspasóz máslıhatynda.
Onyń aıtýynsha, jaıaý júrginshiler jolaǵynda elektr samokatymen kele jatqan adam aldyn ala dybys belgisin berip, eskertý jasaýy kerek.
«Jalpy, jyldamdyǵy saǵatyna 25 shaqyrymnan aspaıtyn elektr samokattarynyń qozǵalysyna qatysty shekteýler qarastyrylyp otyrǵan joq. Bul turǵyda olar velosıpeldter sııaqty barlyq jerde júre alady. Eń bastysy, qaýipsizdik talaptaryn saqtaýy tıis», - dedi Erbol Seıpılov.
Onyń sózine qaraǵanda, qazirgi kezde mamandarmen, jaýapty vedomstvo ókilderimen birge jyldamdyǵy saǵatyna 25 shaqyrymnan asatyn elektr samokattaryn qaı sanatqa jatqyzý máselesi talqylanyp jatyr.
Atalǵan standart samokattardyń jyldamdyǵy men basqa da qaýipsizdik talaptaryna sáıkestigin retteıdi. Osy oraıda bul qurylǵylarda mindetti túrde jaryq shamdarynyń bolýy sııaqty talaptar eskeriledi.
«Standart jobasynyń alǵashqy redaktsııasyn jasadyq jáne búgin birinshi tehnıkalyq taldaý júrip jatar. Osy saladaǵy qaýymdastyqtarmen, Іshki ister mınıstrligi ókilderimen qarastyryp, bıyl tamyz nemese qyrkúıek aıynda qujatty qabyldaımyz dep oılaımyn», - dedi komıtet basshysy.
