Qazaqstanda elektr qýaty naryǵyn engizý 2019 jylǵa deıin shegeriledi
«Májilis maquldaǵan elektr energetıkasy máselelerine arnalǵan zań jobasyna sáıkes, biryńǵaı elektr qýaty naryǵyn engizý kózdeledi. Bul naryqtyń enýi elimizdegi elektr energetıkasy salasyna ınvestıtsııa deńgeıin jetkilikti deńgeıde qamtamasyz etýdi qarastyryp, osy baǵyttaǵy tıimdi tetikterdi qamtymaq. Bul óz kezeginde elimizdiń uzaqmerzimdi keleshegindegi senimdi energııa júıesine de oń áser etedi», - dedi B. Jaqsalıev.
Vıtse-mınıstrdiń aıtýynsha, Memleket basshysynyń tapsyrmasyna sáıkes, elimizde elektr qýaty naryǵynda biryńǵaı satyp alýshy tetigin engizý máselesi de qarastyrylady. Bunymen bir mezgilde tarıftik saıasat ta jetildiriledi. «Bul bir jaǵynan salanyń transparenttiligin qamtamasyz etse, ekinshi jaǵynan básekege qabilettilikti arttyrady. Naryqtaǵy tarıf eki quramdastan turady - bular elektr qýaty úshin jáne elektr energııasy úshin tólemderdi qarastyrady. Alaıda, búgingi ekonomıkalyq daǵdarystyń saldaryna oraı qalyptasyp otyrǵan jaǵdaıǵa baılanysty óndirisindegi energııa qamtymdylyǵy joǵary iri ónerkásip kásiporyndary ózderiniń óndirisin tómendetkeni belgili. Osyǵan baılanysty olar Úkimetke elektr qýaty naryǵyn engizýdi 2019 jylǵa deıin shegerýdi usynǵan bolatyn», - dedi B. Jaqsalıev.
Aıta keterligi, atalǵan naryqty engizý buǵan deıin 2016 jylǵa josparlanǵan bolatyn. Vıtse-mınıstrdiń sózine qaraǵanda, elektr qýaty naryǵy engizilgen jaǵdaıda iri ónerkásip kásiporyndary qıyndyqqa ushyraýy yqtımal, óıtkeni ondaı nysandarǵa energııa tutyný qymbatqa túsedi. Osyǵan baılanysty Úkimet atalǵan usynysty qoldap otyr.
