Qazaqstanda elektr qýatyna yqpal etetin 30-ǵa jýyq joba qarastyrylǵan

ASTANA. KAZINFORM – Eldegi 19 elektr stantsııasynda tozý deńgeıi 65 paıyzdan astam. Bul týraly elordada «Energetıkalyq jáne kommýnaldyq sektorlardy jańǵyrtý» ulttyq jobasyn talqylaý kezinde QR Ulttyq ekonomıka vıtse-mınıstri Asan Darbaev málim etti.

- Elimizde 77 energııa óndirýshi uıym bolsa, onyń ishinde 19 stantsııada tozý deńgeıi 65 paıyzdan astam. Ulttyq joba aıasynda energııa júıesin damytý eskerilgen, ıaǵnı 15 jańa joba qarastyrylǵan, - dedi A. Darbaev.

Sonymen qatar, qoldanystaǵy energııa kózderin jańǵyrtýǵa baǵyttalǵan 14 jobany júzege asyrý josparlanǵan. Bul baǵytta 1,8 trln teńge qarastyrylǵan.

- Osy jumystardyń nátıjesinde qoldanystaǵy aktıvter jańartylady. Bul turǵyda tozý deńgeıin orta eseppen 15 paıyzǵa azaıtýǵa múmkin bolady, - dedi vıtse-mınıstr.

Budan buryn habarlaǵandaı, energetıkalyq sektorda jańǵyrtýdyń ulttyq jobasyn bes jáne odan da uzaq merzimde júzege asyrý úshin 13 trln teńge qajet.