Qazaqstanda elektr energııasyn tutyný kúrt artty
NUR-SULTAN. QazAqparat – Bıyǵy jyldyń úsh toqsanynda Qazaqstanda elektr energııasyn óndirý 83,6 mlrd kVt/saǵ-ty qurady. Bul bir jyl burynǵyǵa qaraǵanda 7,7% kóp, dep habarlaıdy QazAqparat ranking.kz-ke silteme jasap.
Elektr energııasyn tutyný 7%, ıaǵnı 2,9 mlrd kVt/saǵ-qa (Ońtústik aımaq boıynsha 12% jýyqqa) deıin artty.
Qazaqstannyń úsh óńirinde - Atyraý, Pavlodar jáne Soltústik Qazaqstan oblystarynda elektr energııasy artyǵymen qalyp jatsa, qalǵan óńirlerde energııa tapshylyǵy baıqalady. Olardyń kóbinde tutyný óndiristen birneshe ese asyp túsedi.
Jaryqty tutyný kóleminiń ulǵaıýy elimizdiń barlyq óńirinde tirkelgen, eń kóbi — Qyzylorda (jylyna 16,5%), Batys Qazaqstan (14,3%), Aqmola (14,2%), Túrkistan (12,7%) jáne Almaty (11,4%) oblystarynda.
Aıta keteıik, elektr energııasyn tutynýdyń mundaı ósimi ótken jylǵy kórsetkishterden kúrt asyp túsedi. 2020 jyldyń uqsas kezeńinde elektr energııasyn tutyný kóleminiń ósimi tek 1,5%, 2019 jyly — 1,6% quraǵan bolatyn.
Tek bıylǵy jyldyń qyrkúıek aıynda sektorda tutyný kólemi 8,7 mlrd kVt/saǵ-ty qurady, bul 2020 jyldyń qyrkúıegine qaraǵanda 7,5% kóp. Eń joǵary jyldyq ósim Batys Qazaqstan (28%), Túrkistan (15%) jáne Aqmola (13%) oblystarynda baıqaldy.
