Qazaqstanda elektr energııasyn óndirý kólemi 30 paıyzǵa artty

NUR-SULTAN. QazAqparat - Qazaqstanda elektr energııasyn óndirý kólemi 30 paıyzǵa artty. Alaıda, parnıktik gazdar shyǵaryndylaryn azaıtýǵa baǵyttalǵan jańartylatyn energııa kózderin engizý boıynsha elder reıtınginde Qazaqstan sońǵy oryndardyń birinde. Bul týraly QazAqparat energyprom.kz saıtyna silteme jasap habarlaıdy.

Bıylǵy jyl basynda Qazaqstanda jańartylatyn energııa kózderin (JEK) paıdalaný obektileriniń belgilengen qýaty 2 myń MVt qurady. Bul ótken jyldyń basymen salystyrǵanda 23%-ǵa artyq.

Aıta keterligi, 2016 jylmen salystyrǵanda jańartylatyn energııa kózderi nysandarynyń belgilengen qýaty birden 6,8 ese artqan. Ornatylǵan qýattyń basym bóligi kún elektr stansalaryna, taǵy 34%-y jel elektr stansalaryna tıesili. Odan keıin shaǵyn sý elektr stansalary (281 MVt) jáne bıoelektr stansalary (7,8 MVt) tur.

Byltyr jańartylatyn energııa kózderiniń obektilerinen elektr energııasyn óndirý jylyna birden 30,1%-ǵa ósip, 4,2 mlrd kVt/saǵ qurady. Elektr energııasyn óndirýdiń jalpy kólemindegi jańartylatyn energııa obektileri óndiretin elektr energııasynyń úlesi 3,7%-ǵa jetti.

Balamaly qýat kózderi arasynda elektr energııasyn óndirýdiń basym bóligi jel elektr stansalarynan alyndy: naqtylaı aıtqanda 42,1% nemese 1,8 mlrd kVtsaǵ, jyl saıynǵy ósim 65%-dy qurady. Kún elektr stansalary – 1,6 mlrd kVt/saǵ, shaǵyn sý elektr stansalary – 799,7 mln kVt/saǵ, bıoelektr stansalary – 3 mln kVt/saǵ óndirdi.

bp.com portalynyń málimetinshe, 2020 jyly búkil álem boıynsha jańartylatyn energııa nysandary arqyly elektr energııasyn óndirý jylyna 12,8% ósip, 3,1 trln kVt/saǵ jetti. Óndiris jaǵynan kósh bastap turǵan elder – Qytaı, AQSh jáne Germanııa. TOP-3 elderdiń úlesine álemdegi jańartylatyn energııa kózderinen óndiriletin barlyq elektr energııasynyń 52,3%-y tıesili.

TMD elderi arasynda birinshi orynda Ýkraına tur: munda elektr energııasyn óndirý kólemi 9,7 mlrd kVt/saǵ qurady, bul bir jyl burynǵydan birden 83,9%-ǵa artqanyn ańǵartady. Ekinshi jáne úshinshi qatarda tıisinshe Qazaqstan (munda portal derekteri QR Energetıka mınıstrliginiń kórsetkishterinen erekshelenedi jáne 3,7 mlrd kVt/saǵ elektr energııasyn quraıdy) jáne Reseı (3,5 mlrd kVt/saǵ) elderi ornalasqan.