Qazaqstanda elden shyǵarylǵan shetel azamattarynyń úlesi 50 paıyzǵa artqan

ASTANA. KAZINFORM – Bıyl 9 aıda kóshi-qon zańnamasyn buzǵan úshin 70 myńǵa jýyq shetel azamaty ákimshilik jaýapkershilikke tartylyp, 4, 7 mlrd teńge kóleminde aıyppul salyndy.

- Elimiz shetel azamattarynyń qaýipsiz júrip-turýyna jaǵdaı jasap, kóshi-qon baqylaýyn qamtamasyz etý úshin tıisti shara qoldanady. Zań buzylǵan jaǵdaıda jaýapkershilik bar. Statıstıkaǵa súıensek, bıyl 9 aıda 306 myń shetel azamaty ákimshilik jaýapkershilikke tartyldy, olardyń 14,1 myńy elden shyǵaryldy, bul kórsetkish 50% ósti. Kóshi-qon zańnamasyn buzǵan úshin 70 myńǵa jýyq shetel azamaty ákimshilik jaýapkershilikke tartylyp, 4,7 mlrd teńge kóleminde aıyppul salyndy, - dedi Іshki ister mınıstrligi Kóshi-qon qyzmeti komıtetiniń tóraǵasy Aslan Atalyqov Ortalyq kommýnıkatsııalar qyzmeti alańynda ótken baspasóz máslıhatynda.

Sondaı-aq Kóshi-qon komıteti basshysy keltirgen málimetke sáıkes 16 myń shetel azamatynyń elde júrý merzimi qysqartylǵan.

- Turaqty turatyn shetel azamattary arasynda 3 411 zań buzý faktisi anyqtalyp, elde turýǵa quqyq beretin qujattarynyń (yqtııarhattarynyń) kúshi joıyldy. Shetel jumys kúshin zańsyz tartqany úshin 3 myńnan astam jumys berýshi jaýapkershilikke tartyldy, (2024j. - 2938) olarǵa 359 mln teńgege aıyppul salyndy, - deıdi ol.

Spıkerdiń aıtýynsha, shetel jumys kúshin zańsyz tartatyn 5 óńir qatarynda Almaty, Astana, Shymkent Qaraǵandy jáne Túrkistan oblysy bar.

- Jumys kúshin birneshe ret zańsyz paıdalanǵan jumys berýshiler qylmystyq jaýapkershilikke tartylady. Bul baǵytta ótken jyly 7 fakti tirkeldi, bıyl 8 tulǵa qylmystyq jaýapqa tartylyp jatyr, - dep qorytyndylady ІІM ókili.

Buǵan deıin qazaqstandyqtar jumys isteýge kóbine qaı elderge baratyny týraly jazǵan edik.