Qazaqstanda «El birligi» ordeni bekitilýi múmkin

ASTANA. QazAqparat – Endi ult birligin nyǵaıtý jolynda eńbek etken qazaqstandyqtar «El birligi» ordenimen marapattalýy múmkin. Bul týraly kópshilik talqyǵa shyqqan Úkimet ókiminde jazylǵan, dep habarlaıdy QazAqparat tilshisi.

«QR memlekettik nagradalarymen nagradtaýǵa usynýdyń jáne olardy tapsyrýdyń tártibi týraly nusqaýlyqty, QR memlekettik nagradalary qujatynyń úlgilerin jáne QR memlekettik nagradalary belgileriniń sıpattamasyn bekitý týraly» QR Prezıdentiniń 1999 jylǵy 8 qarashadaǵy № 90 ókimine mynadaı tolyqtyrý engizilsin: joǵaryda atalǵan ókimge 3-qosymshada: «Dostyq» (Drýjba) ordeniniń sıpattamasynan keıin osy ókimniń qosymshasyna sáıkes «El birligi» (Edınstvo naroda) ordeniniń sıpattamasy tolyqtyrylsyn», - delingen Ashyq NQA portalynda jarııalanǵan qujatta.

Úkimettiń bul ókim-jobasyn Memleket basshysynyń Qazaqstan halqy Assambleıasynyń XXXII sessııasynda bergen tapsyrmasyna saı Aqparat jáne qoǵamdyq damý mınıstrligi ázirlegen.

Endi atalǵan qujat Prezıdenttiń qaraýyna engizilip, jarlyqpen bekitilmek.

«Ókim jobasy azamattardyń ult birligin nyǵaıtýǵa sińirgen eńbegin tanýǵa baǵyttalǵan. Jobany iske asyrý memlekettik bıýdjetten qosymsha qarjylyq shyǵyndardy talap etpeıdi, sondaı-aq teris áleýmettik-ekonomıkalyq jáne quqyqtyq saldarǵa ákep soqpaıdy», - dep túsindirme berilgen ókim jobasyna.

Qujat 12 shildege deıin kópshilik talqysynda bolady. Keıin Premer-Mınıstr qol qoıyp, Memleket basshysyna joldanady.