Qazaqstanda EKU arqyly qansha bala dúnıege keldi
ASTANA. QazAqparat - Mindetti medıtsınalyq saqtandyrýdy engizý ekstrokorporaldy uryqtandyrýdy qajet etetin árbir áıelge múmkinshilik beredi. Bul jaıynda QazAqparat tilshisine suhbat bergen elimizdegi eń birinshi ekstrokorporaldy uryqtandyrý zerthanasynyń negizin qalaǵan bıologııa ǵylymdarynyń doktory Saltanat Baıqoshqarova aıtty.
«2020 jyldan bastap mindetti áleýmettik medıtsınalyq saqtandyrý engiziledi. Bul árbir áıelge jylyna tym bolmaǵanda bir ret ekstrokorporaldy uryqtandyrýdy tegin jasatýǵa múmkindik beretin bolady», - dedi ol.
Onyń dereginshe, 2010 jyldan beri Qazaqstanda memlekettiń qarajaty esebinen ekstrokorporaldy uryqtandyrý arqyly 1500 bala dúnıege kelgen.
«Eger memlekettik kvota jaıynda aıtar bolsa, onda 2010 jyldan beri 1500 bala dúnıege keldi. Menińshe, bul óte úlken nátıje. Sebebi erli-zaıytylardyń barlyǵynyń birdeı reprodýktıvti densaýlyǵy kináratsyz bolmaǵan kezde de oń nátıjeler bar. Nebári 700-800 myń teńgege mundaı nátıjege qol jetkizý keremet dep esepteımin. Óıtkeni, ózge elderge qaraǵanda bizdiń memleketimizde ekstrokorporaldy uryqtandyrý arzan. Eki, keıde úsh, tipti 10 ese arzan bolyp keledi. Biraq, bizde dári-dármek óte qymbat. Sebebi olardyń barlyǵyn shetelden satyp alamyz», - dedi Saltanat Baıqoshqarova.
Onyń sózine qaraǵanda, buryndary ekstrokorporaldy uryqtandyrý zerthanasyna 40-tan asqan áıelder júginip kelse, qazirgi ýaqytta júginetin áıelderdiń ortasha jasy 35-ti quraıdy.
«Bul adamdar birshama saýatty bola tústi jáne ekstrokorporaldy uryqtandyrýdyń ne ekenin biledi degen sóz», - dedi ol.
