Qazaqstanda eksporttyq-kredıttik agenttik qurylýy múmkin

NUR-SULTAN. QazAqparat – Saýda jáne ıntegratsııa mınıstrligi «Eksporttyq-kredıttik agenttik týraly» Zań jobasyn ázirledi. Talqydan soń qujatty Parlament Májilisiniń qaraýyna jiberý josparlanǵan, dep habarlaıdy QazAqparat tilshisi.

«Zań jobasy eksporttyq-kredıttik agenttiktiń quqyqtyq jaǵdaıyn, qyzmet tártibin, maqsatyn, mindetteri men ókilettigin, onyń memlekettik organdarmen, kásipkerlik sýbektilerimen otandyq shıkizattyq emes taýarlardyń eksportyn damytý jáne ilgeriletý salasyndaǵy ózara is-qımyl tártibin aıqyndaıdy», - delingen mınıstrlik usynǵan Zań jobasynda.

Qujatqa sáıkes, eksporttyq-kredıttik agenttik mynadaı mindetterdi atqarady:

- otandyq eksporttaýshylar men sheteldik satyp alýshylar jasasatyn eksporttyq mámilelerdi erikti saqtandyrý arqyly shıkizattyq emes taýarlardyń (jumystardyń, kórsetiletin qyzmetterdiń) eksportyn yntalandyrý;

- otandyq eksporttaýshylardy jáne olardyń shıkizattyq emes taýarlaryn satyp alatyn sheteldik satyp alýshylardy qarjylandyrý kezinde Ekinshi deńgeıdegi bankterdiń jáne qarjy uıymdarynyń, Qazaqstannyń Damý Bankiniń, ónerkásipti damytý qorynyń táýekelderin saqtandyrý arqyly eksportty qarjylandyrýdy qamtamasyz etý;

- otandyq eksporttaýshylardy qarjylyq qoldaýdy keńeıtý úshin erikti saqtandyrý sharttary boıynsha táýekelderdi qazaqstandyq jáne sheteldik saqtandyrý uıymdaryna, ózge de eksporttyq-kredıttik agenttikterge qabyldap, qaıta saqtandyrýǵa berý;

- otandyq eksporttaýshylarǵa, ımporttaýshylarǵa nemese qarjy uıymdaryna, sheteldik kontragentterge, shıkizattyq emes taýarlardyń tapsyrys berýshilerine eksporttyq mámileler boıynsha kepildikter berý;

- eksportty aldyn ala qarjylandyrý maqsatynda ekinshi deńgeıli bankterde, qarjy ınstıtýttarynda shartty túrde aqsha ornalastyrý arqyly shıkizattyq emes taýarlardyń eksportyn yntalandyrý;

- ınvestıtsııalaý eliniń aýmaǵynda ınvestıtsııalyq salymdardy júzege asyratyn QR rezıdentteriniń ınvestıtsııalaryn saqtandyrý;

- otandyq eksporttaýshylardyń básekege qabilettiligin arttyrý úshin shıkizattyq emes taýarlardy eksportqa shyǵrýda olarǵa servıstik-aqparattyq qoldaý kórsetý;

- respýblıka ekonomıkasynyń turaqty damýyna yqpal etetin ónerkásiptik-ınnovatsııalyq jobalardy iske asyrýǵa qatysý jáne basqa da mindetter.

Jospar boıynsha eksporttyq-kredıttik agenttik syrtqy naryqqa taldaý júrgizý, nesıe jáne lızıngtik mámileler negizinde beriletin syıaqy mólsherlemesin sýbsıdııalaý fýnktsııalaryn atqarady. Sonymen qatar, qurylýy múmkin uıym shıkizattyq emes otandyq taýarlardy satyp alýǵa nıetti sheteldik kompanııalardy izdeýmen, olardy tartýmen aınalysady. Degenmen jańa zańǵa sáıkes, eksporttyq-kredıttik agenttikke kásipkerlik qyzmet retinde mámilelerdi júzege asyrýǵa jáne operatsııalardy júrgizýge tyıym salynady.

Zań jobasy 22 qyrkúıekke deıin ashyq talqyǵa shyǵarylǵan. Keıin Parlamenttiń tómengi palatasynyń qaraýyna jiberiledi.