Qazaqstanda eksporttyq konsortsıýmdar qurylady - «Damý» qorynyń basqarma tóraıymy L.Ibragımova

ASTANA. 22 mamyr. QazAqparat - Halyqaralyq ónerkásiptik yntymaqtastyq ortalyǵy sarapshylarynyń Qazaqstandaǵy qyzmeti nátıjesinde eksporttyq konsortsıýmdar qurylady. Bul týraly búgin VI Astana ekonomıkalyq forýmy aıasynda jýrnalısterge suhbat bergen «Damý» qorynyń basqarma tóraıymy Lázzat Ibragımova málim etti.

Onyń habarlaýynsha, aǵymdaǵy jyly Qazaqstanda ashylatyn Halyqaralyq ónerkásiptik kásipkerlik ortalyǵynyń jumysy barysynda, eń aldymen, tórt sala boıynsha úzdik kompanııalar irikteledi. «Al 2-3 jyldan keıin olar qaıtadan tekseristen ótedi. Dál sol kezde olarǵa eksporttyq konsortsıýmdardy qurý mehanızmderi usynylady. Osynyń arqasynda kásipkerler Dúnıejúzilik saýda uıymy aıasynda emin-erkin jumys isteı alady. Máselen, qazaqstandyq kompanııalar birlesip, «Qazaqstanda jasalǵan» degen taýarlardy basqa memleketterdiń naryqtaryna shyǵara alady», - dep atap kórsetti L.Ibragımova.