Qazaqstanda «Eksporttyq-ımporttyq operatsııalar boıynsha jalǵyz tereze» júıesi 2013 jyly iske qosylady

Bul týraly búgin Úkimet otyrysynda QR Qarjy mınıstri Bolat Jámishev málim etti.

«Tolyqtaı alǵanda 2013 jyly josparǵa sáıkes bul aqparattyq júıeni tolyǵymen iske qosýǵa bolady dep oılaımyn», - dedi ol.

Mınıstrdiń atap ótýine qaraǵanda, aǵymdaǵy jyly elektrondyq deklaratsııalarǵa ilespe qujattardy usyný boıynsha protsedýralardy qosý josparlanýda. «Kelesi jyly jasap bitirsek, 2013 jyly syrtqy ekonomıkalyq qyzmet qatysýshylarymen ózara qarym-qatynasty tolyǵymen elektrondyq formatqa kóshirýge múmkindik bar», - dedi B.Jámishev.

Onyń aıtýynsha, qazirgi tańda halyqaralyq saýdaǵa qatysýshy kompanııalar keden organdaryna usyný úshin qajetti túrli ruqsat qaǵazdaryn, lıtsenzııalar alýǵa kóp ýaqytyn joǵaltyp otyr. Máselen, eksporttyq-ımporttyq operatsııalar boıynsha ártúrli memlekettik organdardan 14 jáne 17 qujat alý qajet. Al «e-tereze» aqparattyq júıesi boıynsha syrtqy ekonomıkalyq qyzmetke qatysýshy memlekettik organdar beretin ruqsat berý qujattary úshin qajetti barlyq málimetter júıelengen bir ǵana qujat toltyrady. Osydan keıin eksporttaýshy nemese ımporttaýshy atalǵan qujatty «e-tereze» aqparattyq júıesine jiberedi. «E-tereze» arqyly baqylaýǵa qajetti aqparat elektrondy túrde belgili bir vedomstvoǵa baǵyttalady.