Qazaqstanda eksporttaýshylardy qoldaýdyń jańa úlgisi ázirlenedi

NUR-SULTAN. QazAqparat – Qazaqstanda eksporttaýshylardy qoldaýdyń jańa modeli ázirlenedi. Bul jaıynda búgin QR Saýda jáne ıntegratsııa mınıstri Baqyt Sultanov aıtty, dep habarlaıdy QazAqparat tilshisi.

«Qazaqstandyq ónimdi ótkizý naryǵyn keńeıtý úshin Ortalyq Azııa, Reseı jáne Qytaı naryqtary basym baǵyttar retinde aıqyndalǵan. Búgingi kúni «bir tereze» qaǵıdaty arqyly eksporttaýshylardy qoldaýdyń jańa modeli engizilip jatyr. Bul rette biz kásipkerler palatasymen, holdıngtermen, damý ınstıtýttarymen birge eksporttaýshylarymyzdy servıstik qoldaýdyń jańa tásilderin jasaıtyn bolamyz. Qazirgi ýaqytta bul máseleniń ózektiligi óte aýqymdy. Eksporttaýshylar úshin «bir tereze» joq, keńinen qoldaýdan da ada», - dedi mınıstr vedomstvonyń Memleket basshysynyń taıaýdaǵy Joldaýynyń negizgi baǵyttaryn túsindirýge arnalǵan alqa otyrysynda.

Sonymen qatar Baqyt Sultanov Eýrazııalyq odaqtyń aıasynda mınıstrlik ózekti máseleler men strategııalyq baǵyttar ázirlep, EAEO-daǵy áriptes elderdiń naryqtarynda qazaqstandyq taýarlardy ilgeriletýge bóget jasaıtyn kedergilerdi joıý jumystaryn júrgizip jatqanyn aıtty.

«Biz halyqaralyq arenada Dúnıejúzilik saýda uıymynyń barlyq kelissózderine, sonyń ishinde Qazaqstan úshin keleshekte paıdaly bolatyn baǵyttaryna belsendi qatysýǵa nıettimiz», - dedi ol.