Qazaqstanda eksporttalatyn taýarlar baǵasy 13,3% artty

ASTANA. QazAqparat - Qazaqstanda eksporttalatyn taýarlar baǵasy 2018 jyldyń tamyzynda onyń aldyndaǵy aımen salystyrǵanda - 3,5%, 2017 jyldyń jeltoqsanyna qaraǵanda 13,3% artty. Importtalatyn taýarlarǵa sáıkesinshe 1,3% jáne 4,5% joǵary boldy, dep habarlaıdy QazAqparat QR Ulttyq ekonomıka mınıstrligi Statıstıka komıtetine silteme jasap.

Jyl basynan beri eksporttyq jetkizilimder baǵasy munaıǵa - 19,8%, marganets kenderine - 19,5%, mys kenderine - 17,6%, mysqa - 14,9%, tabıǵı gazǵa - 13,6%, ferroqorytpalarǵa - 12,8%, temir kenderine - 10,7%, qara metall prokatyna - 10%, kómirge - 8,5%, alıýmınııge 8,2% joǵarylady. Myryshqa kerisinshe, 11,1% tómendedi.

Sondaı-aq baǵanyń arpaǵa - 14,8%, maqtaǵa - 6,5%, bıdaıǵa 6,1%  joǵarylaǵany tirkeldi. Júnniń quny 6% arzandaǵan.

Importtalatyn ónimderden jemis jáne jańǵaqtar - 58,7%, qus eti - 19,7%, balyq - 12,3%, shaı - 8,5%, qant 2,2% qymbattady. Al kakao - 6,6%, margarın - 3%, ósimdik maıy - 2,3%, makaron ónimderi - 2,2%, kofe 1,5% arzandaı túsken.

Aıaq kıimder - 25,2%, qaǵaz - 13,8%, plastmassa - 8,8%, toqyma buıymdary 7,6% qymbatqa satyla bastady.