Qazaqstanda ekpeniń arqasynda juqpaly aýrýlardan ólim-jitim 20 paıyzǵa azaıdy
ALMATY. QazAqparat - Qazaqstanda ekpeniń arqasynda juqpaly aýrýlardan ólim-jitim 20 paıyzǵa azaıdy. Bul týraly QazAqparat tilshisine Sanıtarlyq-epıdemıologııalyq saraptama jáne monıtorıng ǵylymı-praktıkalyq ortalyǵynyń bólim bastyǵy Aınagúl Qýatbaeva aıtty.
«Júrgizilgen baqylaýdyń qorytyndysyna sáıkes, Qazaqstannyń biraz aımaqtarynda pnevmokokk juqpasyna qarsy ekpeniń arqasynda odan bolatyn ólim-jitim 20 paıyzǵa azaıdy. Al, syrqattaný deńgeıi 50 paıyzǵa tómendedi. Mundaı kórsetkish ShQO, Mańǵystaý oblystarynda tirkelip otyr», - dedi Aınagúl Qýatbaeva. Onyń aıtýynsha, bıylǵy ekpeniń ulttyq kúntizbesinde aıtarlyqtaı ózgeris joq. «Bıyl pnevmokokk juqpasyna qarsy ekpe Pavlodar, Aqtóbe, Astana qalalarynda engiziledi. 2015 jylǵa qaraı atalǵan ekpemen elimizdiń barlyq oblysy qamtylatyn bolady», - dedi Aınagúl Qýatbaeva. Mamannyń pikirinshe, Qazaqstanda ekpeniń arqasynda kúl aýrýy 2008 jyldan beri tirkelmegen. «Qazaqstanda byltyr qyzylshany juqtyrǵan 73 balanyń kóbiniń ata-anasy kezinde ekpeden bas tartqan. Qazir ata-analar ǵalamtordan, basqa da aqparat kózderinen ekpe aǵzaǵa zııandy degen aqparat estip alyp, shatasyp júr. Buǵan bálkim Eýropadaǵy ekpege qarsy qozǵalystyń órshýi yqpal etken shyǵar. Alaıda, qazir Eýropada qyzylsha men qyzamyqtyń burq etpelerin kórip otyrmyz. Reseıde ekpeden bas tartqan baptıster qoǵamynda da qyzylshanyń burq etpesi anyqtaldy», - dedi ol. Onyń aıtýynsha, qazir shyǵarylyp jatqan ekpeniń jańa túrleri densaýlyqqa meıilinshe qaýipsiz ári olar balalar arasynda múgedektik pen ólim-jitimdi azaıtýǵa baǵyttalǵan.
