Qazaqstanda ekovolonterler qozǵalysy keń qanat jaıyp keledi – Prezıdent
ASTANA. KAZINFORM – Búgin elordadaǵy Óńirlik ekologııalyq sammıt aıasyndaǵy volonterlik jáne ekologııalyq is-sharalar sessııasynda QR Premer-mınıstriniń orynbasary – Mádenıet jáne aqparat mınıstri Aıda Balaeva Memleket basshysynyń quttyqtaý hatyn oqyp berdi.
– Búgingi Astana – tek saıası jáne ekonomıkalyq ortalyq qana emes, tabıǵatqa janashyr, qoǵam bolashaǵyna beıjaı qaramaıtyn jandardyń basyn qosqan ortaq rýhanı keńistikke aınalyp otyr. Búgingi basqosý ekologııalyq jaýapkershilik mádenıetin ornyqtyrýǵa, memleket pen qoǵamnyń kúsh-jigerin toǵystyrýǵa, eń bastysy – izgilik jolynda aıanbaı eńbek etip júrgen azamattardy qoldaýǵa baǵyttalǵan mańyzdy qadam dep bilemin. Memleket tarapynan elimizde volonterlik qozǵalysty, sonyń ishinde ekologııalyq bastamalardy damytýǵa erekshe mán berilip keledi. Bul – bolashaqqa degen jaýapkershiliktiń, tabıǵatqa degen qurmettiń naqty kórinisi. Men úshin búgin Memleket basshysy Qasym-Jomart Kemeluly Toqaevtyń sessııa qatysýshylaryna joldaǵan quttyqtaý hatyn jetkizý – zor mártebe. Endeshe, El Prezıdentiniń ystyq yqylasy men jyly lebizin oqyp bereıin, - dedi A. Balaeva.
Atalǵan hatta Prezıdent Óńirlik ekologııalyq sammıttiń volonterlik qyzmetke arnalǵan sessııasynyń ashylýyna oraı óz quttyqtaýyn jetkizgen.
– Bul – Qazaqstannyń bastamasymen Birikken Ulttar Uıymy jarııalaǵan Halyqaralyq eriktiler jyly aıasynda ótetin negizgi is-sharanyń biri. Qazir búkil álem transshekaralyq, jahandyq sıpaty bar klımattyq syn-qaterlermen betpe-bet kelip otyr. Oǵan tótep berý úshin birlesip áreket etýimiz kerek. Osy oraıda, Óńirlik ekologııalyq sammıt pen arnaıy sessııalardyń aıasynda Birikken Ulttar Uıymymen áriptestik ornata otyryp, Ortalyq Azııanyń turaqty damýyna qatysty ortaq kózqaras qalyptastyrý mańyzdy. Qorshaǵan ortaǵa qamqorlyqpen qaraý birlese ósip-órkendeýge umtylǵan aımaq elderiniń de, búkil halyqaralyq qaýymdastyqtyń da yntymaǵyn arttyra túsetin qýatty faktorǵa aınaldy. Volonterlerdiń búgingi basqosýy – sonyń aıqyn dáleli. Eriktiler – nıeti túzý, jany taza adamdar. Sizder atqaryp jatqan ıgi is pen adal eńbek ózgelerge erekshe jiger beredi, jarqyn bolashaqqa degen senimdi nyǵaıtady, - dep atalyp ótken Qasym-Jomart Toqevtyń hatynda.
Memleket basshysy tabıǵat janashyrlary jyl saıyn mıllıondaǵan tal egetinin, tonnalap qoqys shyǵaratynyn, júzdegen sý qoımalaryn tazartatynyn jáne aǵartýshylyq sıpaty bar aýqymdy bastamalardy júzege asyratynyn sóz etti.
– Qazaqstanda ekovolonterler qozǵalysy keń qanat jaıyp keledi. Ortaq iske 100 myńnan astam jasampaz ári otanshyl azamatymyz atsalysyp júr. Elimizde ozyq ekologııalyq oılaý mádenıetin damytatyn «Taza Qazaqstan» jalpyulttyq jobasy iske asyrylyp jatyr. Jaqynda jalpyhalyqtyq referendýmda qabyldanǵan elimizdiń jańa Konstıtýtsııasynda tabıǵatty aıalaý jáne volonterlik qyzmet qoǵam damýynyń negizgi ustanymdarynyń biri retinde kórsetildi. Qazaqstan klımatqa qatysty ózekti máselelerdi sheshý úshin júıeli jumysty jalǵastyra beredi. Bıyl elimizde Aqtaýdaǵy Kaspıı aımaǵy men Qyzylordadaǵy Aral mańy aýmaǵynyń tabıǵatyn qalpyna keltirýge baǵyttalǵan halyqaralyq volonterlik aptalyqtar ótedi. Sizderdi ózara kómek, tilektestik jáne jaýapkershilik mádenıetin ornyqtyratyn osy asa mańyzdy bastamalarǵa belsene atsalysýǵa shaqyramyn. Biz bárimiz kúsh jumyldyrsaq, kúlli álem kórkeıip, taza ári jaıly bola túsedi dep senemin, - dedi Prezıdent.
Budan buryn habarlanǵandaı, keshe elordada Memleket basshysy Qasym-Jomart Toqaevtyń qatysýymen «Ornyqty bolashaqqa ortaq kózqaras» taqyrybymen Óńirlik ekologııalyq sammıt (ÓES) jumysyn bastady.
Prezıdent sý qaýipsizdigi Qazaqstan ǵana emes, búkil Ortalyq Azııa úshin asa mańyzdy másele ekenin atap ótti.
