Ekonomıkanyń ósý draıverleriniń biri aýyl sharýashylyǵy bolady
ASTANA. KAZINFORM — Búgin Quryltaıda Ulttyq ekonomıka birinshi vıtse-mınıstri Azamat Ámrın elimizdiń 2027–2029 jyldarǵa arnalǵan áleýmettik-ekonomıkalyq damý boljamyn tanystyrdy.
- Boljam álemdik ekonomıkanyń damý boljamdary men syrtqy naryqtardaǵy konıýnktýrany eskere otyryp qalyptastyryldy. Halyqaralyq valıýta qorynyń shilde aıynda jańartylǵan boljamyna sáıkes, 2027 jyly álemdik ekonomıkanyń ósimi 3,4 paıyzdy quraıdy. Halyqaralyq uıymdar men jahandyq ınvestıtsııalyq bankter 2027 jylǵa munaı baǵasyna qatysty boljamdaryn tómendetti. Konsensýs-boljam barreline 70,3 AQSh dollaryna deıin tómendetildi. Osyny eskere otyryp, bazalyq nusqada munaı baǵasy barreline 70 AQSh dollary deńgeıinde alyndy. Syrtqy syn-qaterlerdiń saqtalýyna qaramastan, Qazaqstan ekonomıkasy ósýin jalǵastyrýda, - dedi A. Ámrın.
Onyń sózine qaraǵanda, bazalyq nusqaǵa sáıkes 2027 – 2029 jyldary jalpy ishki ónimniń naqty ortasha jyldyq ósýi 5 paıyzdan joǵary deńgeıde boljanyp otyr. Nomınaldy jalpy ishki ónim 2027 jyly 199,3 trln teńgeden 2029 jyly 245 trln teńgege deıin ósedi.
- Óńdeý ónerkásibiniń ósý qarqyny taý-ken ónerkásibiniń ósý qarqynynan joǵary bolady. Óńdeý ónerkásibiniń ósýine metallýrgııa, mashına jasaý, qurylys materıaldaryn óndirý, hımııa ónerkásibi, tamaq ónimderin óndirý negizgi úles qosady. Ekonomıkanyń ósý draıverleriniń biri aýyl sharýashylyǵy bolady. Onyń jyl saıynǵy ortasha ósýi keminde 5 paıyzdy quraıdy. Qurylysta ósý qarqyny 2027 jyly 16 paıyzdan 2029 jyly 17,3 paıyzǵa deıin artýy boljanýda. Buǵan kóliktik-logıstıkalyq, energetıkalyq jáne sý ınfraqurylymyn odan ári damytý jónindegi jobalardy josparly iske asyrý, sondaı-aq turǵyn úı-kommýnaldyq jáne áleýmettik-ınfraqurylymdy jańǵyrtý yqpal etetin bolady, - dedi vıtse-mınıstr.
Qyzmet kórsetý salasynda da turaqty serpin saqtalady. Saýda orta eseppen jylyna 5,7 paıyzǵa, kólik jáne qoımalaý 10,4 paıyzǵa, aqparat jáne baılanys 9,2 paıyzǵa ósedi.
Buǵan deıin habarlanǵandaı, búgin Quryltaıda 2027-2029 jyldarǵa arnalǵan respýblıkalyq bıýdjet jobasy tanystyryldy.
