Qazaqstanda ekonomıkalyq belsendilik deńgeıi artyp keledi – Ulttyq bank

ASTANA. QazAqparat – Bıylǵy jyl basynan álemdegi ekonomıkalyq belsendilik oń úrdisti baıqatty. Bul týraly Senattyń jalpy otyrysynda Ulttyq bank tóraǵasy Ǵalymjan Pirmatov aıtty, dep habarlaıdy QazAqparat tilshisi.

«2021 jylǵy 4,3% salystyrǵanda, jalpy ishki ónim 2022 jyly 3,3% artty. Osyǵan qaramastan, 2023 jyldyń basynan beri álemdegi ekonomıkalyq belsendilik oń úrdisti baıqatty. Bul iskerlik belsendilik ındeksterinde kórinip otyr. Biz osy jaǵdaıdyń Qazaqstanda da oryn alǵanyn baıqadyq. Bes aıdyń qorytyndysy boıynsha jalpy ishki ónimniń ósimi 4,5% baǵalandy», - dedi Ǵ. Pirmatov.

Onyń aıtýynsha, byltyr azyq-túlik pen shıkizat baǵasynyń álemdik deńgeıde ósýinen, fıskaldyq yntalandyrýdan Qazaqstanda ınflıatsııa jedeldeı tústi. Álemdegi logıstıkaǵa qatysty jaǵdaıdyń jaqsarýyna qaramastan, sanktsııalar men batys elderi kompanııalarynyń Reseıden ketýi Qazaqstanda taýar jetkizý joldarynyń qalpyna kelýine kedergi boldy. Osy jaǵdaılar qosymsha proınflıatsııalyq qysym kórsetti.

«Nátıjesinde 2022 jyldyń sońynda ınflıatsııa 20,3% jetti. Azyq-túlik baǵasynyń ósimi ınflıatsııaǵa edáýir úles qosty. Ulttyq bank ınflıatsııany turaqtandyrý úshin ınflıatsııalyq targetteý rejımin ustana otyryp, dezınflıatsııalyq monetarlyq saıasatty júrgizýde. 2022 jyly Ulttyq bank bazalyq mólsherlemeni 16,75% deıin kóterdi. Bazalyq mólsherlememen qatar teńgedegi aktıvterdiń kiristiligi de ósti», - dedi UB basshysy.