Qazaqstanda ekonomıkalyq blok qyzmetkerlerin MMÝ baǵdarlamasy boıynsha oqytý usynyldy

ASTANA. KAZINFORM — Qazaqstan Respýblıkasy Premer-mınıstriniń orynbasary – ulttyq ekonomıka mınıstri Serik Jumanǵarın M.V. Lomonosov atyndaǵy Máskeý memlekettik ýnıversıteti fılıalynyń dırektory Aleksandr Sıdorovıchpen kezdesti. Bul týraly Úkimet málim etti.

— Kezdesý barysynda fılıal dırektory 2024 jyly magıstratýrada qosymsha oryn bólýdiń nátıjesinde birqatar zamanaýı bilim berý baǵdarlamasy iske qosylǵanyn atap ótti. Olardyń ishinde: «Esepteý tehnologııalary jáne jasandy ıntellekt ádisteri», «Matematıka jáne derekterdi taldaý ádisteri», «Mádenıetaralyq kommýnıkatsııa jáne aýdarma», «Qalalar men óńirlerdiń tómen kómirtekti damýyn basqarý», «Qazirgi ekonomıkadaǵy statıstıka jáne derekterdi basqarý» bar, — delingen habarlamada.

Búginde fılıalda 717 stýdent oqysa, onyń 523-i bakalavrıatta, 194-i magıstratýrada. 2025-2026 jyldarǵa jańa baǵyttar boıynsha bakalavrıatqa qabyldaý 90 orynǵa keńeıtildi (50 — 2025 jyly jáne 40 — 2026 jyly). Túlekter tarapynan qyzyǵýshylyqtyń artýy jańartylǵan baǵdarlamanyń qajettiligin kórsetip, magıstratýrany odan ári damytýǵa negiz boldy.

Úkimettiń málimetinshe, kezdesý kezinde Aleksandr Sıdorovıch 2026 oqý jylynda ekonomıkalyq bloktyń memlekettik qyzmetshilerin MMÝ «Ulttyq ekonomıka jáne ekonomıkalyq saıasat» keshki magıstrlik baǵdarlamasy boıynsha eki jyl merzimge oqytý múmkindigin qarastyrýdy usynǵan. Talapkerlerdiń tizimi bolǵan jaǵdaıda MMÝ fılıaly túsý emtıhandaryna sátti daıyndalý úshin birqatar dáris uıymdastyrý múmkindigin qarastyrady.

Jıyn sońynda Serik Jumanǵarın Ulttyq ekonomıka mınıstrligine Qarjy mınıstrligimen jáne «Ekonomıkalyq zertteýler ınstıtýty» AQ-men birlesip, memlekettik qyzmetshilerdi irikteý tártibimen qatar osyndaı oqytýdy uıymdastyrý múmkindigin jan-jaqty pysyqtaýdy tapsyrdy.

Aıta keteıik, buǵan deıin Serik Jumanǵarın tranzıttik júkti kedendik tekserý sanyn azaıtýdy tapsyrǵan edi.