Qazaqstanda ekonomıka úshin keleshegi zor 200-deı ǵylymı joba irikteldi
dep habarlady pm.kz saıty QR Bilim jáne ǵylym mınıstrliginiń baspasóz qyzmetine silteme jasap.
«Ekonomıkaǵa engizý úshin perspektıvasy zor ǵylymı jobalar turaqty iriktelip jáne saraptama júrgizilip turady. Qazir qorjynda osyndaı 200-deı joba bar», -delingen mınıstrlik habarlamasynda.
Ótken jyly energetıka, shıkizatty jáne ónimderdi tereń óńdeý, aqparattyq jáne telekommýnıkatsııalyq tehnologııalar, ómir týraly ǵylymdar jáne eldiń zııatkerlik áleýeti sııaqty bes jańa ǵylymı basymdyq bekitildi.
Aıta ketý kerek, joǵary oqý oryndarynyń osyndaı ǵylymı jobalardy oryndaýǵa atsalysýy 2010 jyly 33% bolsa, 2012 jyly 57% deıin ósti.
Bilim jáne ǵylym mınıstrliginiń aqparaty boıynsha, 2 jylda bedeldi álemdik basylymdarda jarııalanǵan maqalalardyń sany 2 eseden astamǵa ósip otyr. Mysaly, ótken jyly qazaqstandyq ǵalymdar 478 maqala jarııalasa, aǵymdaǵy jyldyń birinshi jartyjyldyǵynda 500-den astam maqala jarııalady. Jyldyń qorytyndysy boıynsha maqalalar sany 800 ben 1000 arasynda bolady, jáne osy nátıje Qazaqstanǵa 5 jylda 10000 astam maqala jarııalaǵan elderdiń qataryna kirýge múmkindik beredi.
Oǵan qosa, qazaqstandyq ǵalymdardyń eńbekterine silteme jasaý ındeksi 3 eseden astamǵa ósip otyr. Búginde AQSh, Ulybrıtanııa, Germanııa, Izraıl, Ispanııa, Italııa, Kanada, Polsha, Ońtústik Koreıa, Japonııa sııaqty damyǵan elderdiń ókilderiniń siltemeleri edáýir artýda.
Qazirgi tańda ǵylymı salada ındýstrııalyq-ınnovatsııalyq damý talaptaryna sáıkes ǵylym basymdyqtaryn tańdaý jáne tájirıbelik nátıjege baǵyttalǵan naqty ınnovatsııalar beretin zertteý jobalaryn irikteý sııaqty jańa tetikter iske qosylýda.
