Qazaqstanda ekologııany qorǵaýdyń jańa qadamdary engiziledi
ASTANA. QazAqparat - Qazaqstanda Qorshaǵan ortaǵa áserin baǵalaý konventsııasy aıasynda Strategııalyq ekologııalyq baǵalaýdy engizýdi josparlaýda.
Bul týraly ekologııa máseleleri boıynsha dóńgelek ústelde QR Energetıka vıtse-mınıstri Maǵzum Myrzaǵalıev málim etti, dep habarlaıdy QazAqparat.
«Ekologııanyń lastanýyn aldyn alý sharasy retinde qorshaǵan ortaǵa áserin baǵalaý qadamy sátti engizildi. Sonymen birge Qazaqstan 2000 jyly Qorshaǵan ortaǵa transshekaralyq kontekste áser etýdi baǵalaý jónindegi konventsııany ratıfıkatsııalady. Bul qujat 1991 jyly Espo qalasynda qabyldanǵan bolatyn. Osy oraıda elimiz qoldanystaǵy zańnamany jetildirýdi jalǵastyrýda. Munymen qosa, eýropalyq elder qorshaǵan ortaǵa áserdi baǵalaý men halyq densaýlyǵyna qatysty qadamdardy jaqsartý boıynsha jumysty jalǵastyrýda. Bul jumystyń nátıjesi retinde 2003 jyly Qorshaǵan ortaǵa áserin baǵalaý konventsııasyna Strategııalyq ekologııalyq baǵalaý boıynsha hattamany qabyldaý boldy»,-dedi Myrzaǵalıev.
Onyń sózine qaraǵanda, Strategııalyq ekologııalyq baǵalaýdyń (SEB) negizgi maqsatynda qoǵamdyq pikirdi eskere otyryp, memlekettik josparlaý kezeńinde bolýy múmkin ekologııalyq saldardy baǵalaý jónindegi qadamdardy paıdalaný eskerilgen. Qazirgi ýaqytta tabıǵatty qorǵaý organdary memlekettik josparlaý júıesindegi barlyq qujattardy kelisýge qatysady.
«TMD-nyń keıbir elderi Strategııalyq ekologııalyq baǵalaý jónindegi hattamany ratıfıkatsııalady. Qazirgi ýaqytta Qazaqstanda Strategııalyq ekologııalyq baǵalaýdy paıdalaný múmkindigin zertteý úshin Eýropalyq odaqpen jáne BUU DB-men qoldaý tapqan joba iske asyrylýda. Atqarylǵan jumystyń nátıjesi elimizde SEB elementterin engizý boıynsha múmkindikterge nusqaıdy»,-dedi vıtse-mınıstr.
Ol óz sózinde 2013 jyly Prezıdenttiń Jarlyǵymen «jasyl» ekonomıkaǵa kóshýdiń tujyrymdamasy bekitilgenin eske salyp ótti. Bul turǵyda balamaly energııanyń úlesi 2020 jylǵa qaraı 3 paıyzǵa jetýi tıis. 2016 jyldaǵy kórsetkish 1 paıyzǵa jetkenin baıqatady. 2025 jylǵa qaraı onyń deńgeıin 5 paıyzǵa, 2030 jyly 10 paıyzǵa, 2050 jylǵa qaraı 50 paıyzǵa deıin jetkizý maqsaty kózdelgen.
