Qazaqstanda ekologııalyq júıelerdi saqtaýǵa qatysty saıt ashyldy

ASTANA. QazAqparat - 5 maýsym kúni atap ótiletin Dúnıejúzilik qorshaǵan orta kúniniń qarsańynda Qazaqstandaǵy BUU Damý Baǵdarlamasy jáne Qazaqstan Respýblıkasy Aýyl sharýashylyǵy mınıstrliginiń (QR AShM) Orman sharýashylyǵy jáne janýarlar dúnıesi komıteti Jahandyq ekologııalyq qordyń (GEF) qarjylaı qoldaýymen ekologııalyq júıelerdi saqtaý jáne paıdalaný salasynda biregeı Ǵalamtor-resýrsty iske qosty, dep habarlaıdy QazAqparat.

«Ekojúıelerdi saqtaý jáne ornyqty paıdalaný salasyndaǵy synama jobalar» ǵalamtor-resýrsy Qazaqstandaǵy BUU DB jáne QR AShM Orman sharýashylyǵy jáne janýarlar dúnıesi komıtetiniń «Eko-Damý» Shaǵyn nesıelendirý baǵdarlamasy tarapynan júzege asyrylatyn bıologııalyq san-alýandylyqty saqtaý, jańǵyrtylmaly qýat kózderin jáne «jasyl tehnologııalardy» engizý, ári orman sharýashylyǵyn ornyqty basqarý boıynsha barlyq synama jobalar týraly aqparatty qamtıdy. 

Qazirgi tańda portalda Qazaqstannyń tórt óńiri boıynsha 123 joba týraly málimet bar: 1) Almaty oblysy 43 joba arqyly usynylǵan; 2) Qyzylorda oblysy - 54 joba; 3) Mańǵystaý oblysy - 26 joba; 4) Shyǵys Qazaqstan oblysy - 1 joba.

Aýyl sharýashylyǵy, atap aıtqanda - topyraqtyń tozýyn qysqartý, otarly mal sharýashylyǵy, ósimdik sharýashylyǵy, qus sharýashylyǵy, kókónis sharýashylyǵy boıynsha jobalar týraly málimetter keńinen keltirilgen. Qazaqstanda endi damyp kele jatqan týrızm baǵyty retindegi ekologııalyq týrızm týraly aqparat erekshe qyzyǵýshylyq týdyrady. Portaldaǵy aqparat udaıy jańartylyp otyrady.

Portal BUU DB qoldaý bildiretin jáne GEF pen QR Úkimeti qarjylandyratyn «Qorǵalatyn aýmaqtar ishinde jáne olardyń aınalasynda bıologııalyq san-alýandylyqpen úılesimdi tirshilikti qamtamasyz etý kózderin ilgeri bastyrý arqyly shóldi ekojúıelerdegi qorǵalatyn aýmaqtar júıesiniń ornyqtylyǵyn arttyrý» jobasy aıasynda ashylǵan.

Portal qyzyǵýshylyq tanytqan qoldanýshylarǵa ornyqty aýyl jáne orman sharýashylyǵyn júrgizý, resýrs únemdeýshi tehnologııalardy engizý, erekshe qorǵalatyn tabıǵı aýmaqtardyń mańynda ornyqty qyzmet-qareket túrlerin damytý salalaryndaǵy júzege asyrylǵan jáne asyrylyp jatqan synama jobalar týraly málimetter alýǵa múmkindik beredi.

Qazaqstan landshaft keshenderiniń biregeı jınaǵyna ıe: shólden bastap bıik taýly aımaqtarǵa jáne ishki teńiz ekojúıelerine deıin. Qýań jerler el aýmaǵynyń 75 paıyzdan astamyn alyp tur. Osyndaı óte sırek kezdesetin úılesimniń arqasynda Qazaqstanǵa ekojúıelerdiń jáne olardyń quramdas bólikteriniń bıologııalyq san-alýandylyǵy deńgeıi joǵary bolýy tán.

Sonymen qatar, Qazaqstandaǵy tabıǵı tepe-teńdik qorshaǵan ortanyń azyp-tozýy saldarynan uqypsyz sharýashylyq júrgizýden aıaýsyz buzyldy. Respýblıkadaǵy asa mańyzdy ekologııalyq másele shóleıttený bolyp tabylady. Shóleıttený jáne tozý úderisterine respýblıka aýmaǵynyń shamamen 70 paıyzy shaldyqqysh keledi. Antropogendik (adamı) qareketterdiń tegeýrinimen kóptegen janýarlar túrleriniń sany azaıa bastady jáne olardyń mekendeıtin aımaqtary taryla bastady. BUU DB Qazaqstandaǵy seriktesterimen birge eldegi bıologııalyq san-alýandylyqty saqtaý salasyndaǵy jobalardy júzege asyrady.