Qazaqstanda ekologııalyq taza ónimder týraly zań qabyldanady
ASTANA. QazAqparat - Qazaqstanda «Organıkalyq ónim óndirý týraly» zańy qabyldanady.
Esterińizge sala keteıik, qujat Májiliste jáne Senatta maquldanyp, Memleket basshysynyń qol qoıýyna joldandy.
«Atalǵan zańdy qabyldaý halyq densaýlyǵy men tutynýshylar quqyǵyn, qorshaǵan ortany qorǵaýdy qamtamasyz etý, sondaı-aq organıkalyq ónimdi óndirý salasynda kásipkerlik qyzmettiń básekege qabilettiligin damytady, eksportty arttyrady jáne basqa mańyzdy múmkindikterge jol ashady», - dedi búgin «Qazaqstandaǵy organıkalyq aýyl sharýashylyǵyn damytýdaǵy bastamalardy qoldaý» taqyrybyndaǵy dóńgelek ústelde QR Parlamenti Senatynyń depýtaty Álı Bektaev.
Depýtattyń sózine qaraǵanda, bul baǵyttaǵy jumystardy jalǵastyrý kerek. Osy oraıda ol halyqaralyq standarttar negizinde ónimdi sertıfıkattaý men óndirý jaǵdaıynda tıimdi júıeni engizý qajet ekenin jetkizdi.
Óz kezeginde QR Aýyl sharýashylyǵy mınıstrligi Ekonomıkalyq ıntegratsııa basqarmasynyń basshysy Zeınolla Sháripov osy saladaǵy halyqaralyq qoldaý sharalary týraly aıtyp berdi. Máselen, 2014 jyly bul baǵytta tıisti joba bastaý alyp, osyǵan sáıkes BUU-nyń azyq-túlik jáne aýyl sharýashylyǵy uıymy ulttyq zańnamany zertteýge, sertıfıkatsııa júıesin qurýǵa, sondaı-aq talqylaýlar júrgizý úshin elimizge 340 myń dollar kóleminde qarjy bólgen.
«Joba eki jyl boıy júzege asyrylýda. Aldymyzdaǵy taǵy da bir jarym jyl bar. Budan keıin de birqatar dóńgelek ústelderdi, trenıngterdi ótkizý josparlanyp otyr. Bul turǵyda qyzyǵýshylyq tanytqan barlyq adamdardy belsendi tartýǵa tyrysamyz», - dedi Z. Sháripov.
