Qazaqstanda ekologııalyq problemalar kartasy jasalady
Uıym basshysynyń orynbasary Eldos Abaqanovtyń aıtýynsha, Qazaqstannyń Ekologııalyq kodeksinde qoǵamdyq baqylaý sharalary qarastyrylǵan. Alaıda búginde atalǵan sharalar atqarylmaıdy.
«Kodekstiń 15-bóliminde qoǵamdyq-ekologııalyq baqylaý quraly bar. Biraq bul jumys istemeı otyr. Sol sebepti biz qaýymdastyqtyń negizinde ekologııalyq baqylaý ınstıtýtyn qurǵymyz kelip otyr. Instıtýt bolǵanda arnaıy oqý orny emes, baqylaý quraly retinde. Osyǵan oraı, osy jyldyń ishinde biz birqatar aımaqtarǵa baryp, sol jerde ekologııalyq-qoǵamdyq baqylaý jasaǵymyz kelip otyr. Sonyń ishinde Atyraý jáne taǵy basqa aımaqtar bar. Ekologııalyq máseleler qaı aımaqta ózekti bolyp tur, sol jerlerdi aralaımyz. Budan bólek, bıyl ekologııalyq problemalardyń dıskartasyn jasaımyz. Osy jylǵa osyndaı josparymyz bar», - dedi E.Abaqanov Astanada ótken baspasóz máslıxatynda.
Onyń sózine qaraǵanda, bıznestiń ekologııalyq jaýapkershiligine arnalǵan reıtıngti ázirleý kezinde kásiporyndardyń kóbisi birlesip jumys isteýge kelisti.
«Reıtıngtiń negizinde biz qaı kásiporyndar qoǵammen jumys isteýge daıyn ekenin kórip otyrmyz. Odan bólek, qaı aımaqtarda ekologııany qarjylandyrý arqyly jáne taǵy basqa jumystar arqyly jaqsartýǵa bolatynyn bilemiz. Osy jumysty ary qaraı jalǵastyrmyz», - dep atap kórsetti E.Abaqanov.
Aıta keteıik, ótken jyly Ekologııalyq kodekstiń tujyrymdamasyn ázirleý aıasynda bıznestiń ekologııalyq jaýapkershiligi men aımaqtardyń ekologııalyq tıimdiligine arnalǵan reıtıngterdi jasaý máselesi kóterilgen bolatyn.
Osyǵan oraı, Qazaqstannyń ekologııalyq uıymdarynyń qaýymdastyǵy, Interfaks-ERA agenttigi men Halyqaralyq jasyl texnologııalar jáne ınvestıtsııalyq jobalar ortalyǵy yntymaqtastyq týraly memorandýmǵa qol qoıyp, birlesip jumys isteýge kiristi. Osy jolǵy reıtıngke 200-den astam qazaqstandyq kompanııa qatysty. Budan bólek, elimizdiń 20 iri kompanııasy Reseıdiń TOP-150 reıtıngisine endi.
