Qazaqstanda ekologııalyq aıyppuldar somasy tym joǵary - «Shevron»
ASTANA. QazAqparat - «Shevron» korporatsııasynyń paıymynsha, Qazaqstanda ekologııaǵa keltirilgen zalal úshin aıyppul somasy tym joǵary.
«Bizdiń ekologııalyq zańnama qorshaǵan ortany qalpyna keltirýge jáne qorǵaýǵa, sondaı-aq tabıǵat paıdalanýshy men memleket arasyndaǵy qatynastardy retteýge baǵyttalmaǵan», - dedi búgin elimizdiń ekologııalyq zańnamasyn jetildirý boıynsha jumys tobynyń birinshi otyrysynda «Shevron» korporatsııasynyń eýrazııalyq bólimshesiniń basqarýshy keńesshisi Jumageldi Elýbaev. Sonymen qatar ol osyǵan baılanysty bir jyl buryn iri ken ornyn paıdalanýshylardy, kásibı jáne salalyq qaýymdastyqtardy jumyldyrý arqyly jańa tujyrymdama men zań jobasy ázirlengenin jetkizdi. «Ekologııalyq zańnama retteıtin bul erejeler aıqyn ári túsinikti bolýyn qalaımyz. Zańsyz is-qımyldar kezinde sharalar algorıtmi suraqtar týdyrady. Osy oraıda qorshaǵan ortaǵa zalaldardy óteý mindeti basymdyǵymen algorıtmdi engizý usynylýda. Ony júzege asyrý óte jeńil, ıaǵnı matematıkalyq formýlalar arqyly sandardy qoıyp, keltirilgen shyǵyn anyqtalady. Qazirgi kezde zań buzýshylyqqa jol bergen kompanııalarǵa mıllıardtaǵan somamen esepteletin aıyppuldar salynýda. Bizdiń sheteldik sarapshylar usynǵan qujattarǵa qaraǵanda, birde bir elde bizdegideı osyndaı úlken somalar sanalmaıdy», - dedi sarapshy.
