Qazaqstanda ekologııalyq áskerı bólimsheler qurý usynyldy
ASTANA. QazAqparat - Búgin Parlament Májilisinde «Parıj kelisimin ratıfıkatsııalaý týraly» zań jobasyn talqylaý kezinde «Tabıǵat» ekologııalyq odaǵynyń basshysy Mels Eleýsizov Qazaqstanda áskerı salaǵa shyǵystardy qysqartyp, únemdelgen qarjyny ekologııalyq problemalardy sheshýge baǵyttaýdy usyndy.
«Biz bul baǵytta aıtarlyqtaı ilgerileýge múmkindigimiz bar. Biz ıadrolyq qarýdan bas tarttyq, al eger de áskerı shyǵyndardy qysqartýdy bastasaq, ekologııa úshin bul jaqsy nasıhattaý qadamy bolar edi»,-dedi ol.
Sonymen qatar M. Eleýsizov jastar máselesine de toqtalyp ótti.
«Búginde jastar erikkennen ne isterin bilmeı, kóbinese túngi klýbtarǵa jıi barady dep aıtylýda. Osy rette ekologııalyq áskerı bólimshelerdi qurýdy usynamyn. Bul turǵyda jastar kýrstardan ótip, ormandy alqaptardy keńeıtýge úlesin qosar edi. Ózderińiz bilesizder, elimizde ormandy jerlerdiń úlesi kóp emes. Sondyqtan ormandy alqaptardy kóbeıtsek, bul óz kezeginde halyqaralyq turǵyda úlgi bolar edi»,-dedi ol.
Osy oraıda M. Eleýsizov ekologııany qorǵaýda naqty isterge kóshý kerektigin atap óttti.
