Qazaqstanda ekologııalyq avıaotyn óndiretin zaýyt salynady
ASTANA. KAZINFORM – QazMunaıGaz ulttyq kompanııasy ekologııalyq avıatsııalyq otyn (SAF – Sustainable Aviation Fuel) óndirisin iske qosýdy josparlap otyr.
Tehnıkalyq-ekonomıkalyq negizdemeni ázirleý týraly kelisimdi «QazMunaıGaz-Aero» JShS, amerıkalyq LanzaJet, Inc. kompanııasy jáne eldegi iri agroónerkásiptik holdıngterdiń biri – «KazFoodProducts» JShS jasasty.
Kompanııada naqtylaǵandaı, ótken jyly aldyn ala tehnıkalyq-ekonomıkalyq negizdeme (pre-FEED) kezeńi sátti aıaqtalǵan. Negizdeme jyl sońyna deıin daıyn bolady dep josparlanǵan.
– Jobany júzege asyrý Memleket basshysy Qasym-Jomart Toqaevtyń Qazaqstandy damyǵan tranzıttik áleýeti bar halyqaralyq avıatsııalyq habqa aınaldyrý jónindegi tapsyrmasy aıasynda erekshe mánge ıe, - delingen habarlamada.
Kelisimge qol qoımas buryn bıyl naýryzda AQSh-ta Qazmunaıgaz ulttyq kompanııasynyń basqarma tóraǵasy Ashat Hasenov pen LanzaJet kompanııasynyń bas dırektory Djımmı Samartsıs arasynda kezdesý ótip, onda SAF óndirisi salasyndaǵy yntymaqtastyqtyń bolashaǵy talqylandy.
Tehnıkalyq-ekonomıkalyq negizdemeni daıyndaý kezinde taraptar zaýytty ornalastyrý úshin ońtaıly óńirdi tańdaý, óndiris kólemderin anyqtaý jáne ınvestıtsııalyq sheshim qabyldaýǵa qajetti basqa da mańyzdy parametrlerdi qosa alǵanda keshendi taldaý júrgizedi.
SAF – álemdik avıatsııa salasynda standartty Jet A-1 avıaotynyna ekologııalyq qospa retinde qoldanylady jáne kómirqyshqyl gazynyń shyǵaryndylaryn azaıtýǵa yqpal etedi. QazMunaıGaz-dyń úsh munaı óńdeý zaýyty 2018 jyldan bastap Jet A-1 óndirýge daıyn. Qoldanystaǵy TS-1 avıaotyn standartynan Jet A-1-ge kóshý Qazaqstan áýejaılaryndaǵy otyn quıý ınfraqurylymyn jańǵyrtýmen qatar júrip jatyr.
Sondaı-aq ulttyq kompanııanyń málimetinshe, atalǵan aýqymdy joba eldi Parıj kelisimi aıasyndaǵy kómirtegi beıtaraptyǵyna jaqyndatady jáne jetekshi halyqaralyq áýe tasymaldaýshylary men júk kompanııalaryn tartýǵa múmkindik ashady.
Eske sala ketsek, byltyr elimizde avıaotyn tapshylyǵyn sheshý úshin biryńǵaı operator qurylatyny aıtylǵan edi.
Birer kún buryn Úkimet basshysy Oljas Bektenov avıaotyn naryǵyn damytý máseleleri boıynsha keńes ótkizdi.