Qazaqstanda ekologııa jaǵynan «taza» oblys joq - N. Áshimov

Kıoto hattamasynyń tetikterin iske asyrý» atty taqyrypta ótken Úkimet saǵatynda QR Qorshaǵan ortany qorǵaý mınıstri Nurǵalı Áshimov osylaı málim etti, dep habarlaıdy QazAqparat.

«Ekologııalyq kartany alyp qarasaq, keń-baıtaq Qazaqstannyń barlyq oblystary, barlyq óńirleri túrli zııandy, zalaldy zattarmen bylǵanǵan. ıAǵnı, respýblıka boıynsha ekologııalyq «taza» oblys joqtyń qasy. Máselen, ortalyq óńirdi qaraıyq - Arqa jerinde - synap, Temirtaýda - karbıd, Pavlodarda - hımııa zaýyty, Aqmola, Pavlodar oblystarynda ýran óndirisiniń úıindileri saqtaýly. Respýblıkanyń batys aımaǵyndaǵy Atyraý oblysynda  kúkirt úıindileri mólsherden tym artyq. Óńirde aýmaǵy 5 myń gektar alapta jatqan qaramaıly jerler batystyń barlyq oblysyn qamtyǵan. Mańǵystaý oblysynda radııatsııalyq qaldyqtar bolsa, Aqtóbe oblysyndaǵy eń qaýipti másele - hrom. Qazaqstannyń ońtústiginde  1 mlrd. 1 mln. tonnadan astam óte qaýipti bolyp tabylatyn fosfor qaldyqtary jınaqtalǵan. Shyǵysta  lastanǵan shahta sýlarynyń ózenderge quıylýy úlken ekologııalyq problema týdyryp otyr. Budan basqa, aımaqta ónerkásip oshaqtarynyń kúlge aınalǵan úıindileri alańdatarlyq másele bolyp tabylady. Burynnan kele jatqan áskerı polıgondar, onyń ishinde birinshi kezekte Semeı polıgony, Azǵyr polıgony men Baıqońyrdyń qorshaǵan ortaǵa jaǵymsyz áseri zor ekendigi belgili», dedi mınıstr.

Sonymen birge, N. Áshimov elimizdegi kommýnaldyq, turmystyq qaldyqtarǵa da nazar aýdaryp ótti. Onyń aıtýynsha, respýblıka boıynsha 6 myń 325 eldi mekende kommýnaldyq qaldyqtardyń  4 myń 525 polıgony bar bolsa, bunyń tek 7 paıyzy ǵana zańdastyrylǵan. Al jınalǵan qaldyqtardyń tek 2 paıyzy ǵana kádege jaratylsa, basqalary ashyq-shashyq kúıinde jatyr, aýaǵa taralýda. «Elimizde kommýnaldyq qaldyqtardy jınaý jáne shyǵarý qyzmetimen eldi mekenderdiń tek 25 paıyzy qamtamasyz etilgen», dedi N. Áshimov.