Qazaqstanda ekinshi ortalyq júrek aýystyrý otasyn endi óz betinshe jasaı alady

ALMATY. KAZINFORM — Almaty kardıologııalyq ortalyǵy resmı túrde júrek transplantatsııasyn júrgizýge ýákiletti medıtsınalyq uıymdar tizimine engizildi. Bul týraly qalalyq qoǵamdyq densaýlyq saqtaý basqarmasy habarlady.

Bul sheshimdi Densaýlyq saqtaý mınıstrliginiń Transplantatsııa jáne joǵary tehnologııalyq medıtsınalyq qyzmetterdi úılestirý jónindegi respýblıkalyq ortalyǵy men «University Medical Center» (UMC) korporatıvtik qory birlesip qabyldaǵan.

Osylaısha, Almaty kardıoortalyǵy UMC ortalyǵynan keıin Qazaqstanda júrek transplantatsııasyn óz betinshe jasaý quqyǵyna ıe bolǵan ekinshi medıtsınalyq uıym atandy.

Mekemede joǵary kúrdeli otany oryndaýǵa qajetti barlyq jaǵdaı jasalǵan: joǵary bilikti kardıohırýrgtar, anestezıologtar men reanımatologtar jumys isteıdi. Sonymen qatar zamanaýı dıagnostıkalyq jáne emdeý ádisteri engizilip, halyqaralyq standarttarǵa saı joǵary tehnologııalyq jabdyq ornatylǵan.

— Qalalyq kardıologııalyq ortalyqtyń transplantatsııalyq ortalyqtar tizimine engizilýi — otandyq kardıohırýrgııanyń damýy jolyndaǵy mańyzdy qadam. Bul Almaty turǵyndarynyń joǵary tehnologııalyq medıtsınalyq kómekke qoljetimdiligin arttyrady jáne onyń sapasyn jańa deńgeıge kóteredi, — delingen basqarma taratqan habarlamada.

Eske salaıyq, buǵan deıin Almatyda 43 jastaǵy er adamǵa júrek transplantatsııasy jasalǵanyn habarlaǵanbyz.

Jalpy elimiz boıynsha 4 myńnan astam adam transplantatsııa kezeginde tur. Onyń ishinde 3 723 naýqas búırekke muqtaj.