Qazaqstanda «ekinshi Qashaǵan» paıda bolýy múmkin: QMG jobanyń egjeı-tegjeıin ashty
ASTANA. KAZINFORM — Qazaqstanda áleýeti jaǵynan Qashaǵan ken ornyna teń keletin iri karbonatty massıv anyqtaldy. Bul týraly Astanada ótip jatqan GECA 2026 halyqaralyq geologııalyq forýmynda «QazMunaıGaz» basqarma tóraǵasynyń birinshi orynbasary Qurmanǵazy Esqazıev aıtty.
Onyń aıtýynsha, geologııalyq barlaý jumystarynyń negizgi baǵyty Qaraton, Qajyǵalı jáne Jylyoı ýchaskelerin qamtıtyn Jylyoı karbonatty platformasy bolyp otyr.
— Ashylǵan Qaraton, Qajyǵalı jáne Jylyoı karbonatty massıvi Qashaǵan ken ornynyń qurylymyn qaıtalaıdy. Massıvtiń resýrstyq áleýeti 4,7 mlrd tonna (kómirsýtekter). Bul Qashaǵannyń geologııalyq áleýetimen shamalas. Alaıda Qashaǵan taıaz teńiz aımaǵynda ornalasqandyqtan, úlken kapıtaldyq shyǵyndy talap etedi. Al bul massıv qurlyqta ornalasqan. Osylaısha, kapıtaldyq shyǵyn edáýir tómendeıdi, — dedi Qurmanǵazy Esqazıev.
Jalpy alǵanda, Jylyoı karbonatty massıviniń resýrstyq áleýeti 20 mlrd tonna shartty otynǵa baǵalanyp otyr.
Qaraton ýchaskesinde qazirdiń ózinde tereńdigi 5750 metr bolatyn uńǵyma burǵylanyp, jumystar oń nátıje bergen. Bes perspektıvaly nysan anyqtalǵan.
Kompanııa basshysynyń birinshi orynbasary Qaratondaǵy tabysty nátıjeden keıin geologııalyq barlaý jumystaryn Qajyǵalı ýchaskesinde keńeıtý josparlanyp otyrǵanyn aıtty. Qazirgi ýaqytta jer qoınaýyn paıdalaný kelisimshartyn alý boıynsha kelissózder júrgizilip jatyr.
Jańa joba qoldanystaǵy ónimdi bólý týraly kelisimderge áser etpeıdi jáne bólek ári basqa kompanııalarmen, onyń ishinde «Tatneftpen» seriktestikte júzege asyrylady.
Buǵan deıin «QazMunaıGaz» «Qalamqas-teńiz» ben «Hazar» ken oryndaryn ıgerýge jańa seriktes qarastyratynyn jazǵan edik.
