Qazaqstanda ekinshi ret devalvatsııa oryn almaıdy - Elbasy
;ALMATY. Qarashanyń 13-i. QazAqparat /Erbol Azanbek/ - Elimizde ekinshi ret devalvatsııa oryn almaıdy.
Bul týraly búgin Elbasy Nursultan Nazarbaev Qazaqstan halqymen tikeleı efır kezinde, almatylyq kórermenniń suraǵyna jaýap berýi barysynda aıtty, dep habarlaıdy QazAqparat.
«Ótken jyly retsessııa kezinde devalvatsııa jasaldy. Bul durys qadam boldy. Qazir ekinshi ret devalvatsııa oryn alady deýge negiz joq. Eldiń altyn qory ósýde. Inflıatsııanyń deńgeıi tómen. Sondyqtan devalvatsııa týraly oılaý qajetsiz», dedi Elbasy. Nursultan Ábishuly sondaı-aq 2 kúnnen soń bolatyn qarjygerlerdiń kásibı merekesi - Ulttyq valıýta kúnimen quttyqtady. Sondaı-aq aımaqtyq ortaq valıýta jasaý týraly usynysymen bólisti.
«Daǵdarys álemdik qarjy salasynda aqaý bar ekendigin kórsetti. 60 jyl buryn iske qosylǵan júıeniń ómir boıy jumys isteýi múmkin emes. Osy rette aımaqtyq valıýtany jasaý tıimdiligi kórindi. Men bul baǵytta jarııalanǵan óz maqalamdy birqatar elderdiń prezıdentterine usyndym. Alaıda, bunyń júzege asýyna biraz ýaqyt kerek», dedi Memleket basshysy.
