Qazaqstanda eki jylda 5 bank naryqtan ketti

NUR-SULTAN. QazAqparat – QR Qarjy naryǵyn retteý jáne damytý agenttiginiń tóraǵasy Mádına Ábilqasymova tólem jasaýǵa qabiletsiz bankterden jáne problemalyq kredıtterden tazartý jumystary týraly aıtyp berdi, dep habarlaıdy QazAqparat tilshisi.

«2021 jyly bank sektoryn tólem jasaýǵa qabiletsiz bankterden jáne jınaqtalǵan problemalyq kredıtterden qalpyna keltirý aıaqtaldy. Sońǵy eki jylda naryqtan 5 bank ketti. 2017 jyldan bastap 8 banktiń lıtsenzııasy qaıtaryp alyndy, 3 iri bank shoǵyrlandyryldy. Jalpy alǵanda, 2017-2021 jyldary 6,6 trln teńge somadaǵy kredıtter esepten shyǵaryldy», - dedi M. Ábilqasymova Qazaqstan qarjygerleriniń IX Kongresinde..

Onyń aıtýynsha, bank sektoryn tazartý nátıjesinde NPL aýqymdy anyqtamasyn sıpattaıtyn problemalyq jáne qaıta qurylymdalǵan kredıtter deńgeıi 2017 jylǵy 40%-dan 2021 jylǵy qazanǵa qaraı 10%-ǵa deıin 4 ese tómendedi. Bul rette 90 kúnnen astam merzimi ótken NPL ózi 4,3%-dy qurady.

«Jumys istemeıtin aktıvterdi bankter balansynan esepten shyǵarýǵa qaramastan, bank júıesiniń aktıvteri sońǵy úsh jylda 41%-ǵa ulǵaıyp, 35,6 trln teńgeni qurady. 2019-2020 jyldary júrgizilgen Aktıvter sapasyn baǵalaý (AQR) kapıtaldyń qajetti qory bar ekenin júıelik jáne jeke deńgeıde rastady. AQR qorytyndysy boıynsha 2020 jyly bankterdiń aktsıonerleri bankterdi 128 mlrd teńgege ústeme kapıtaldandyrdy, qosymsha provızııalar áseri jáne aktıvter sapasyn jaqsartý boıynsha sharalar 600 mlrd teńge somaǵa baǵalandy. Nátıjesinde búgingi kúni bankterdiń kapıtal jetkiliktiligi 25% boldy, bul eń az talaptardan 3 esege artyq», - dedi agenttik tóraǵasy.