Qazaqstanda eki jańa bank qurylýy múmkin

ASTANA. QazAqparat – Qazaqstanda jańa bankterdi ashý talaptary jeńildetilmek. Bul týraly QR Qarjy naryǵyn retteý jáne damytý agenttiginiń tóraǵasy Mádına Ábilqasymova aıtty, dep habarlaıdy QazAqparat tilshisi.

«Qazir mıkroqarjy uıymdary ekinshi deńgeıli bankter retinde qurylýy múmkin. Bizde ekinshi deńgeıli bank retinde qurylýǵa talpynyp otyrǵan eki iri mıkroqarjy uıymy bar, olar - KMF jáne Solva mıkroqarjy uıymdary. Olardyń qomaqty somadaǵy portfeli bar. Kapıtaldarynyń jetkilikti deńgeıi qazirdiń ózinde bank retinde tirkelýge múmkindik berip otyr», - dedi Mádına Ábilqasymova Májiliste tilshiler suraǵyna jaýap bere otyryp.

Onyń aıtýynsha, byltyr tıisti konvertatsııa jasaýǵa múmkindik beretin tıisti zańnamalyq túzetýler qabyldanǵan.

«Ótinish berip, bank lıtsenzııasyn alýǵa bolady. Jańa bankterdiń paıda bolýyna qatysty toqtalsaq, biz jańa bankterdi ashý talaptaryn jeńildetý maqsatynda bank júıesi týraly zańnamaǵa túzetýler ázirlep jatyrmyz. Osy túzetýler qabyldanǵannan keıin, Qazaqstanda bank ashýǵa talpynǵandar kóbeıedi dep sanaımyz», - dedi M. Ábilqasymova.