Qazaqstanda eki kólik jolyn qaıta jóndeýge 319,2 mln dollar jumsalady
Belgili bolǵandaı, 2009 jyly Qazaqstan Respýblıkasy men Halyqaralyq qaıta qurý jáne damý banki arasynda «Batys Eýropa - Batys Qytaı» halyqaralyq tranzıttik dálizin qaıta jóndeý úshin qaryz alý týraly kelisimge qol qoıylǵan bolatyn.
Bıylǵy jyly Qyzylorda jáne Ońtústik Qazaqstan oblystaryndaǵy avtojoldardy qaıta jóndeý jumystary aıaqtalyp, jobany iske asyrýǵa paıdalanylǵan HQBD qaryzy únemdeldi.
Úkimet únemdelgen qarjyny «Kúrti-Býrylbaıtal» jáne «Uzynaǵash-Otar» jobalaryn iske asyrý úshin paıdalaný týraly sheshim qabyldap, nátıjesinde 26 qyrkúıekte Qazaqstan Respýblıkasy men Halyqaralyq qaıta qurý jáne damý banki arasynda qosymsha kelisimge qol qoıyldy.
Osy ýchaskelerdi qaıta jóndeýden ótkizý 2015 - 2019 jyldarǵa arnalǵan «Nurly jol» ınfraqurylymdy damytýdyń memlekettik baǵdarlamasynda kózdelgen.
Uzyndyǵy 85 km (І sanattaǵy 4 jolaqty jol) quraıtyn «Kúrti-Býrylbaıtal» ýchaskesi «Ortalyq - Ońtústik» dáliziniń quramyna kiredi jáne «Astana - Qaraǵandy - Balqash - Kúrti - Qapshaǵaı - Almaty» respýblıkalyq mańyzy bar joldyń bir bóligi bolyp tabylady.
Uzyndyǵy 96 km (І sanattaǵy 4 jolaqty jol) quraıtyn «Uzynaǵash - Otar» ýchaskesi «Almaty - Qordaı - Blagoveşenka - Merke - Tashkent - Termez» respýblıkalyq mańyzy bar joldyń bir bóligi bolyp tabylady.
Aýmaqtardy qalpyna keltirýge ketetin shyǵynnyń boljamdy kólemi 319,2 mln AQSh dollaryn quraıdy, onyń ishinde Halyqaralyq qaıta qurý jáne damý bankiniń qaryzy - 271,3 mln AQSh dollary jáne respýblıkalyq bıýdjetten qarjylandyrý - 47,9 mln AQSh dollary.
Qazaqstan Respýblıkasy Investıtsııalar jáne damý mınıstrligi Avtomobıl joldary komıteti merdigerlik kompanııalardy, sondaı-aq qurylysty qadaǵalaý jónindegi konsýltantty tańdaýǵa kiristi. Qaryz alý týraly kelisim kúshine engennen keıin kelisimsharttar jasalatyn bolady.
Jumystardyń aıaqtalýy 2021 jylǵa josparlanǵan.
