Qazaqstanda eki boksshy qyz chempıonattaǵy orynǵa talasyp qaldy

Qazaqstannyń eki dúrkin chempıony, 2014 jyly ótken jastar arasyndaǵy álem chempıonatynyń jeńimpazy, 60 keli salmaqta bokstasatyn Nazym Işanova ádildikke jetý úshin jýrnalısterden kómek surady. Nazymnyń aıtýynsha, Astanada ótetin álem chempıonatyna nebary 10 kún qalǵanda ony jarysqa qatysý quqyǵynan aıyrǵan. Nazym túsindirgendeı, ony jattyǵý protsesindegi sparrıngtiń (sparrıng - sportshyny jarysqa jan-jaqty daıyndaý maqsatynda ótkiziletin jattyǵý - agenttik ) qorytyndysyna súıene otyryp, álem chempıonatynan alastatqan. Biraq, bul esh qısynǵa kelmeıdi, deıdi boksshy qyz.

«Osy jyldyń aqpanynda men Qazaqstan Respýblıkasyndaǵy boksshy qyzdar arasynda birinshi oryn aldym, sondyqtan da, álem chempıonatyna qatysýym kerek edi. Endi mine, chempıonatqa on kún qalǵanda sparrıng uıymdastyryp, meni jarystan alyp tastady. Aıtatyn ýájderi de ártúrli, men sparrıngte jeńilip qaldy deıdi. Biraq, men jeńdim, tipti, sol sońǵy sparrıngte jeńgenimdi dáleldeıtin beınejazba bar», - deıdi 19 jastaǵy Nazym.

Nazymnyń sol sparrıngtegi qarsylasy - Qazaqstan chempıonatynda ekinshi oryn alǵan Rımma Volosenko eken. Nazymnyń ornyna Álem chempıonatyna shyǵamyn dep otyrǵan da - osy Rımma. Onyń jeke jattyqtyrýshysy - Berik Márjikpaev. Márjikpaev sondaı-aq Astana qalalyq Dene shynyqtyrý jáne sport basqarmasynyń basshysy. Nazym Işanovanyń aıtýynsha, sońǵy sparrıngte Qazaqstan qyzdar quramasynyń bas jattyqtyrýshysy Vadım Prısıajnıýk, memlekettik jattyqtyrýshy Bolat Ábdirahmanov, Aqmola oblysy, Qaraǵandy men Kókshetaý qalalarynan kelgen ózge de jattyqtyrýshylar otyrǵan.

«Rımma Volosenko álem chempıonatynda Qazaqstannyń namysyn qorǵaı almaıdy, oǵan laıyq emes, sebebi, ol jasóspirimder arasyndaǵy, jastar arasyndaǵy, eresekter arasyndaǵy úsh chempıonatta da eshqashan jeńip kórmegen», - deıdi Nazym.

Aıta keteıik, 19-27 mamyr aralyǵynda Astanada ótetin Álem chempıonatynda Olımpıada oıyndarynyń lıtsenzııalary utysqa tigiledi. Sondyqtan, máseleniń mán-jaıyn anyqtaý úshin Qazaqstan boks federatsııasyna habarlasyp, Vadım Prısıajnıýk pen Bolat Ábdirahmanovtyń paıymdaryn tyńdadyq.

Eki tóreshi de Nazym Işanova 2016 jylǵy Qazaqstan chempıonatyn jeńgenin rastady. Biraq, olardyń aıtýynsha, chempıonatta ekinshi jáne úshinshi oryn alǵandar bar. Respýblıkalyq deńgeıdegi jarystardan keıin birinshi quram Qytaıda ótken biliktilik jarysyna attanatyny habarlanǵan, Qytaıǵa barǵan úsh sportshydan tek Darıǵa Shakımova ǵana Olımpıada lıtsenzııasyn jeńip alǵan. Al, álem chempıonaty aldynda eki oqý-jattyǵý ótkizgennen keıin jattyqtyrýshylardyń arasynda pikirtalas týyndap, olar álem chempıonatynda el namysyn qorǵaıtyn naǵyz sportshyny anyqtaý úshin sparrıng uıymdastyramyz dep sheshken eken.

«Árbir jattyqtyrýshy óz oqýshysy úshin alańdaıdy, biraq, shyndyqqa týra qaraý kerek. Işanova jaqsy sportshy, biraq Qytaıda ótken jarystan keıin ol óz formasyn azdap joǵaltty. Sparrıngte ol utyldy», - deıdi B.Ábdirahmanov.

Işanova da, jattyqtyrýshylar da aıtyp turǵan sparrıngtiń nátıjesi 8 mamyr kúni boks federatsııasynyń saıtyna jarııalanǵan. Bul rette, V.Prısıajnıýktyń aıtýynsha, sol kúni sparrıngke Kárim Mahmudov, Qaırat Manashev. Shámil Saıfýllın, Aleksandr Vysotskıı, ıaǵnı, jattyqtyrýshylar keńesiniń músheleri qatysqan.

«Qytaıda ótken biliktilik týrnırynan keıin men sparrıng ótetinin eskertkem jáne keıbir salmaq boıynsha kim myqty bolsa, álem chempıonatyna sol qatysatynyn da aıtqam. Nazymnyń sol kezdegi formasy men qazirgi daıyndyǵyn salystyrsaq, arasy jer men kókteı. Bul jaı sparrıng emes, bári qarap, baqylaıtyn jattyǵý bolatynyn aıtqam. Sondyqtan, «sparrıng bolatynyn bilgen joqpyz» degenderi ótirik. Nazym aıtyp turǵan vıdeo bizde de bar, ony jetekshi de kórdi. Sparrıngke qatysqan úsh juldyzy bar jattyqtyrýshylar jeńisti Rımma Volosenkoǵa berdi. Nazym óte jas sportshy, 1997 jyly týǵan. Ol jastar arasyndaǵy quramadan endi shyǵyp, eresekter arasyna endi ǵana qosyldy. Onyń bolashaǵy áli alda, oǵan áli kóp jattyǵý kerek. El chempıony bolǵan soń, álem chempıonatyna jol ashyldy dep oılaǵany durys emes», - deıdi óz oıyn aıtqan Vadım Prısıajnıýk.

Vadım Prısıajnıýk atap ótkendeı, federatsııa men boksshy arasyndaǵy kelisimshartqa sáıkes, boksshylarǵa Federatsııanyń kelisimin almaı, BAQ-qa málimdeme jasaýǵa bolmaıdy. Bul rette, Nazym Işanova kelisimshartty buzǵany úshin jazalana ma, joq pa, belgisiz ekenin atap ótti ol.