Qazaqstanda eki aıda 150 myńǵa jýyq jeńil avtomobıl tirkeldi
NUR-SULTAN. QazAqparat - Qazaqstanda qańtar-aqpan aılarynda 150 myńǵa jýyq jeńil avtomobıl tirkeldi. Mundaı derekti QR UEM Statıstıka komıteti usyndy, dep habarlaıdy QazAqparat.
«2020 jylǵy qańtar-aqpanda Qazaqstan Respýblıkasynda 149 938 jeńil avtomobıl tirkelgen. Bul ótken jylǵy tıisti kezeńmen salystyrǵanda 2,5 paıyzǵa kem. Qazaqstan Respýblıkasynda 2020 jylǵy 1 naýryzdaǵy jaǵdaı boıynsha tirkelgen jeńil avtomobılderdiń sany 3 862,7 myń birlikti qurady», - delingen vedomstvo aqparatynda.
Tirkelgen kólikterdiń 83,4 paıyzy benzınmen, 13,7 paıyzy aralas otynmen, 2,7 paıyzy dıelmen, al qalǵan 0,2 paıyzy gazben júredi.
Sonymen qatar komıtet dereginshe, jyl basynan bergi eki aıda 2666 adam zardap shekken 1 893 jol-kólik oqıǵasy tirkeldi. Ótken jylǵy tıisti kezeńmen salystyrǵanda apat 6,1 paıyzǵa kóbeıip otyr.
2020 jylǵy 1 naýryzdaǵy jaǵdaı boıynsha saqtandyrý uıymdary kólik quraldary ıeleriniń azamattyq-quqyqtyq jaýapkershilikti mindetti saqtandyrý boıynsha 5,4 mlrd teńge somasyna 13 618 saqtandyrý tólemin júzege asyrdy.
