Qazaqstanda eki agroortalyqty qurý josparlanǵan - vıtse-mınıstr Aıtýǵanov
«Agroónerkásip salasyndaǵy qoldanbaly ǵylymı zertteýlerge ónim óndirýshelerdiń qarjysyn tartý josparlanǵan. Budan bólek, Qazaq ulttyq agrarlyq ýnıversıteti men Sáken Seıfýllın atyndaǵy Qazaq agrotexnıkalyq ýnıversıteti negizinde eki agroortalyqty qurý josparlanyp otyr. Sondaı-aq daıyn ǵylymı texnologııalardyń transferti júrgiziledi. Ol úshin arnaıy ortalyq ta qurylǵan», - dedi Aıtýǵanov Úkimettiń búgingi otyrysynda.
Aıta keteıik, otyrys barysynda QR Aýyl sharýashylyǵy mınıstrligi aldaǵy jumys josparyn tanystyrdy. Atalǵan jospardyń ishinde Jer komıssııasynyń jumysy nátıjesinde qolǵa alynǵan sharalar da bar.
«Atap aıtqanda, jerdiń jańa kadastrlyq baǵasyn belgileý, naqty málimetter bazasyn jasaqtaý jáne geobotanıkalyq kartalardy ázirleý jumysy júrgiziledi. Qazirgi zań jobasy Úkimettiń aqpannyń 16-sy kúngi qaýlysymen Parlamenttiń qaraýyna engizildi », - deıdi Aıtýǵanov.