Qazaqstanda eki jyl ishinde balalardy qorǵaýǵa baǵyttalǵan 11 zań qabyldandy — Dınara Zakıeva

ASTANA.KAZINFORM — Sońǵy eki jylda Qazaqstanda balalardyń quqyqtaryn qorǵaý júıesin kúsheıtýge baǵyttalǵan 11 zań men baǵdarlama qabyldandy. Sonymen qatar 158 naqty sharany qamtıtyn «Qazaqstan balalary» baǵdarlamasy iske qosyldy. Bul týraly Qazaqstan Respýblıkasyndaǵy Bala quqyqtary jónindegi ýákil Dınara Zakıeva Astanada ótken Silk Power 2026 alańynda málimdedi.

Іs-shara barysynda D.Zakıeva balalardyń qaýipsizdigin qamtamasyz etý, aldyn alý júıesin damytý jáne otbasylardy qoldaý sharalary týraly aıtty.

— Memleket basshysynyń tapsyrmasyna sáıkes, sońǵy eki jylda balalardyń qaýipsizdigin qamtamasyz etýge, aldyn alý júıesin damytýǵa jáne otbasylar men balalarǵa kómek kórsetýge baǵyttalǵan 11 negizgi zań men baǵdarlama qabyldandy, — dedi Zakıeva.

Onyń aıtýynsha, óńirlerde ákimdikter janynan balalardyń quqyqtaryn qorǵaý basqarmalary qurylyp jatyr. Sonymen qatar mamandardy oqytý jáne júıeni jetildirý jumystary jalǵasady.

Ombýdsmenniń aıtýynsha, bul jumystyń naqty nátıjesi de bar.

— Tek ótken jyldyń ózinde quzyrly organdar balalardyń qaýipsizdigine qatysty 50 myńnan astam jaǵdaıdy anyqtady. Otbasylarǵa jan-jaqty kómek kórsetilip, balalarǵa quqyqtyq qorǵanys qamtamasyz etildi, — dedi ol.

Sondaı-aq Zakıeva bıylǵy jyldyń basynda qabyldanǵan «Qazaqstan balalary» baǵdarlamasy týraly da aıtyp ótti.

— «Qazaqstan balalary» baǵdarlamasynda balalardyń quqyqtaryn qamtamasyz etýge baǵyttalǵan barlyq sharalar júıelendirildi. Jospar 158 naqty qadam men sharany qamtıdy. ıÝNISEF bul jobanyń balalardy qorǵaý sharalaryn eldiń negizgi zańynda joǵary deńgeıde kúsheıtýge qosqan úlesin atap ótti, — dedi ol.

Aıta keteıik, Silk Power alańy medıtsına, medıa, kommýnıkatsııa salasynyń mamandaryn, memlekettik organdar men qoǵamdyq sektor ókilderin qosa alǵanda, ártúrli saladaǵy áıelderdi biriktirdi.