Qazaqstanda eki qant zaýytyn salýǵa túrik kompanııasy 500 mln dollar ınvestıtsııa salmaq

ASTANA. KAZINFORM - Túrik holdıngi Qazaqstanda jylyna 300 myń tonnaǵa deıin qant óndiretin eki zaýyt salý múmkindigin qarastyryp otyr, dep habarlaıdy QR aýyl sharýashylyǵy mınıstrliginiń baspasóz qyzmeti.

Bul týraly Aýyl sharýashylyǵy mınıstri Aıdarbek Saparovtyń Cengiz Holding túrkııalyq holdıngi dırektorlar keńesiniń múshesi Djengız Shabanmen kezdesýi barysynda málim boldy.

Kelissóz barysynda qant salasyn damytýdyń bolashaǵy, ınvestıtsııa tartý jáne agrarlyq ónimderdi tereń óńdeý baǵytyndaǵy birlesken jobalardy júzege asyrý máseleleri talqylandy.

Aıdarbek Saparov mınıstrlik tarapynan ımportqa táýeldilikti azaıtýǵa jáne ózin-ózi qamtamasyz etýge kóshýge baǵyttalǵan keshendi sharalar qabyldanyp jatqanyn atap ótti.

Qazaqstanda barlyǵy tórt qant zaýyty jumys isteıdi, olardyń úsheýi jylyna 870 myń tonna qant qyzylshasyn óńdeýge qabiletti. Alaıda qantty jyldyq tutyný kólemi 500 myń tonna, al otandyq shıkizattan óndiriletin qant ishki qajettiliktiń tek 14%-yn ǵana qamtıdy.

-Jańa óńdeý qýattaryn qurý jáne turaqty shıkizat bazasyn qalyptastyrý — memlekettiń negizgi basymdyqtarynyń biri. Cengiz Holding bastamasy azyq-túlik qaýipsizdigin nyǵaıtýǵa baǵyttalǵan strategııalyq mańyzdy qadam, — dedi mınıstr.

Túrik holdıngi Qazaqstanda jylyna 300 myń tonnaǵa deıin qant óndiretin eki zaýyt salý múmkindigin qarastyryp jatyr.

Ázirge qant óndirisin damytýǵa laıyqty jer retinde Soltústik Qazaqstan jáne Pavlodar oblystarynyń klımattyq jaǵdaılary, ınfraqurylymy jáne jer resýrstary zerdelený ústinde.

Djengız Shabannyń aıtýynsha, joba aıasynda 10 jylǵa 500 mln AQSh dollary kóleminde ınvestıtsııa qarastyrylǵan.

Eki zaýyttyń qurylysyn kelesi jyly bastap, olardy eki jyl ishinde iske qosý josparlanyp otyr.

Jobany júzege asyrý ishki naryqty qantpen qamtamasyz etýge, sondaı-aq mal azyǵy ónimderine, tamaq ónerkásibine arnalǵan quramdas bólikter, tehnıkalyq spırt jáne basqa da ónimder shyǵaratyn qosalqy óndiristerdi damytýǵa jol ashady.

Taraptar jobany jan-jaqty pysyqtap, jaqyn ýaqytta aldaǵy is qımyldy talqylaýǵa kelisti.

Kezdesý qorytyndysynda jobany iske asyrý jónindegi ózara túsinistik týraly Memorandýmǵa qol qoıyldy. ‎

Osyǵan deıin elimizde eń iri qant zaýyty salynyp, 450 turaqty jumys orny ashylatyny týraly jazdyq.