Qazaq-ózbek shekarasyndaǵy «Atameken» keden beketi qaıta ashyldy

TAShKENT. KAZINFORM – Qazaqstan men Ózbekstan shekarasynda ornalasqan «Atameken – Syrdarııa» kedendik baqylaý beketi jóndeýden keıin qaıta ashyldy, dep habarlaıdy Kazinform agenttiginiń Tashkenttegi menshikti tilshisi.

Ózbekstan Memlekettik keden komıtetiniń málimetinshe, qazirgi ýaqytta atalǵan shekara beketi jaıaý júrginshiler men jeńil kólikterdi ótkizip jatyr.

— Azamattardyń shekaradan ótýi jedel, yńǵaıly ári jeńildeı tústi. Bul rette osy beket arqyly júretin adamdardan shekaradan ótý erejelerin qatań saqtaýyn suraımyz, - dep málim etti vedomstvodan.

Eske salaıyq, 29 naýryzdan bastap Astana men Tashkent arasynda taǵy bir tikeleı áýe reısi ashylady.

Sonymen qatar, bıyl qańtarda 88 myńnan astam qazaqstandyq Ózbekstanǵa saıahattap barǵan.

Qosa ketsek, taıaýda Ózbekstan Memlekettik keden komıtetiniń Strategııalyq josparlaý jáne kedendik rásimderdi ońtaılandyrý basqarmasynyń bastyǵy Farhod Olımjonov Kazinform agenttigine suhbat berip, saıahatshylar qaperde ustaýy tıis erejelerdi aıtqan edi.