Qazaqstanda egizder sany artyp, shala týǵan sábıler úlesi azaıdy — DSM
ASTANA. KAZINFORM — Elimizde 2025 jyly 3 367 egiz jáne 25 úshem dúnıe esigin ashqan. Al 2026 jyldyń alǵashqy eki aıynda 224 egiz jáne 5 úshem ómirge kelgen. Bul týraly Densaýlyq saqtaý mınıstrligi Kazinform agenttiginiń resmı saýalyna bergen jaýabynda málimdedi.
Búginde ana men bala densaýlyǵy kórsetkishterinde de oń dınamıka baıqalady. Máselen, ulttyq statıstıka bıýrosynyń deregine sáıkes elimizde shala týǵan náresteler sany azaıyp keledi.
- Shala týǵan náresteler úlesi 2023 jylǵy 7,3%-dan 2024 jyly 6,2%-ǵa deıin tómendedi. Bul kórsetkishter ana men bala densaýlyǵyn qorǵaý júıesinde qabyldanyp jatqan keshendi sharalardyń tıimdiligin kórsetedi, - dep jazylǵan vedomstvo habarlamasynda.
Mınıstrliktiń málimetinshe, áıelderdiń densaýlyǵyn nyǵaıtý maqsatynda «Analar saýlyǵy» baǵdarlamasy iske asyrylyp jatyr. Joba aıasynda profılaktıkalyq jáne júktilikke deıingi tekserýler, saýyqtyrý sharalary júrgizilip, táýekel faktorlaryn erte anyqtaýǵa baǵyttalǵan 15 negizgi zertteý engizilgen.
- Búginde barlyq óńirdegi medıtsınalyq-sanıtarııalyq alǵashqy kómek kórsetý (MSAK) uıymdary men perınataldyq ortalyqtarda júkti jáne bosanǵan áıelderdiń psıhoemotsııalyq jaǵdaıyn baǵalap, psıhologııalyq qoldaý kórsetetin mamandar jumys isteıdi. Júktilikke deıingi jáne júktilik kezeńindegi ambýlatorııalyq kómekti uıymdastyrý úshin MSAK deńgeıinde 347, al oblystyq perınataldyq ortalyqtar deńgeıinde 23 áıelder konsýltatsııasy qyzmet kórsetedi, - delingen mınıstrliktiń resmı jaýabynda.
Mınıstrlik elimizdiń ár óńirindegi perınataldyq ortalyqtardy jańǵyrtý boıynsha da arnaıy master-josparlardy bekitken.
- Jańǵyrtýdyń basty maqsaty – kadrlardyń biliktiligin arttyrý, materıaldyq-tehnıkalyq bazany nyǵaıtý jáne quzyrettilik ortalyqtaryn qurý arqyly ozyq tehnologııalardy óńirlerge engizý. Bul sharalar árbir áıeldiń júktilik pen bosaný asqynýlary qaýpine sáıkes sapaly medıtsınalyq kómekke teń qoljetimdiligin qamtamasyz etedi. Jańǵyrtý aıasynda perınataldyq ortalyqtardaǵy áıelder konsýltatsııalary transformatsııalanyp, «Salaýatty ana» pansıonattary ashyldy. Sondaı-aq trenıngtik ortalyqtar qurylyp, telemedıtsına qyzmeti damytylýda. Aýyldyq jerlerdegi júkti áıelderge keńes berý sapasyn arttyrý úshin «vırtýaldy aralap qaraý» formaty engizildi, - dep málimdeıdi vedomstvo.
Sonymen qatar, reprodýktıvti densaýlyqty qoldaý baǵytynda keshendi sharalar qolǵa alynǵan. Vedomstvo deregine sáıkes, 2021–2024 jyldar aralyǵynda «Ańsaǵan sábı» baǵdarlamasy aıasynda 28 myńnan astam patsıentke ekstrakorporaldy uryqtandyrý (EKU) jasalǵan. Nátıjesinde 12 myńnan astam áıel júktilik boıynsha esepke alynyp, shamamen 11 myń sábı dúnıege kelgen.
Eske sala keteıik, jaqynda ana men balany qoldaý sharalary jóninde jazǵan edik.
