Qazaqstanda egin oraǵy naýqany bastaldy
ASTANA. KAZINFORM — Qazirgi ýaqytta Almaty, Batys Qazaqstan, Jambyl, Qostanaı, Qyzylorda, Soltústik Qazaqstan, Túrkistan oblystarynyń, Jetisý oblysy men Shymkent qalasynyń aýyl sharýashylyǵy taýaryn óndirýshileri egin oraǵy naýqanyna kiristi.
Aýyl sharýashylyǵy mınıstrliginiń málimetinshe, byltyrǵy osy kezeńmen salystyrǵanda egis alqaptarynyń ónimdiligi edáýir artqany baıqalady.
Búgingi tańda 634 myń tonna dándi daqyl bastyryldy. Ortasha ónimdilik gektaryna 20,6 tsentner bolyp, byltyrǵy osy kezeńdegi kórsetkishten (12,2 ts/ga) 1,7 ese joǵary.
— Negizgi aýyl sharýashylyǵy daqyldary boıynsha da oń úrdis saqtalyp otyr. Atap aıtqanda, bıdaıdyń jalpy túsimi 461,2 myń tonnaǵa jetip, ortasha ónimdiligi — gektaryna 19,1 tsentner. Byltyrǵy osy kezeńde bul kórsetkish gektaryna 13,7 tsentner bolǵan, — delinen habarlamada.
Arpa jınaý naýqany da joǵary nátıjemen júrgizilip jatyr. Qazirgi ýaqytta 157,8 myń tonna arpa jınaldy. Ortasha ónimdilik gektaryna 17,0 tsentner bolyp, byltyrǵy deńgeıden (8,7 ts/ga) eki ese artty.
Egin oraǵy naýqanyn ýaqtyly ári sapaly ótkizý úshin agrarshylar qajetti aýyl sharýashylyǵy tehnıkasymen tolyq qamtamasyz etilgen. Búginde elimizdiń aýyl sharýashylyǵy qurylymdarynda 133,9 myń traktor, 5,6 myń joǵary ónimdi egis kesheni, 71,4 myń tuqym sepkish jáne 188,5 myń topyraq óńdeý tehnıkasy bar.
Sondaı-aq memleket tarapynan 401 myń tonna jeńildetilgen dızel otynyn bólý kózdelgen.
Eske salaıyq, buǵan deıin egindi artyq ylǵaldan saqtandyrýǵa ótinim qabyldaý ýaqyty uzartylǵanyn jazǵan edik.
