Qazaqstanda Ebolamen kúreske arnaıy qurylym qurýdyń esh qajeti joq - Densaýlyq saqtaý mınıstrligi
ASTANA. QazAqparat - Qazaqstanda Ebolamen kúreske arnaıy qurylym qurýdyń esh qajeti joq. Bul týraly QazAqparattyń resmı saýalyna oraı QR Densaýlyq saqtaý jáne áleýmettik damý mınıstrligi málim etti.
«Bıologııalyq qaýipsizdik, ınfektsııalyq, karantındik, asa qaýipti aýrýlar, onyń ishinde Ebola bezgegin ǵylymı-zertteý jumystary, dıagnostıkalaý, sonymen qatar epıdemııaǵa qarsy aldyn alý sharalaryn júrgizý Qazaqstan Respýblıkasynyń Ulttyq ekonomıka mınıstrligi Tutynýshylar quqyǵyn qorǵaý komıtetiniń quzyrynda», - delingen habarlamada.
Vedomstvo aqparatyna qaraǵanda, komıtet qurylymyna Respýblıkalyq sanıtarlyq-epıdemıologııalyq saraptama jáne monıtorıng ǵylymı-zertteý ortalyǵy, M.Aıqymbaev atyndaǵy Qazaq karantındik jáne zoonozdyq juqpalar ǵylymı ortalyǵy, H. Jumatov atyndaǵy gıgıena jáne epıdemıologııa ǵylymı ortalyǵy, oblystardyń, Astana men Almaty qalalarynyń sanıtarlyq-epıdemıologııalyq qyzmet organdary kiredi.
«Infektsııalyq aýrýlar boıynsha epıdemıologııalyq ahýal asqynǵan jaǵdaıda jergilikti atqarýshy organdarmen shyǵystar qarastyrylǵan», - delingen mınıstrlik aqparatynda.
Vedomstvonyń aqparatyna qaraǵanda, búginde Ebola bezgegin emdeýdiń kelisilgen tásili joq.
Aıta keterligi, Ebola bezgegi Ortalyq jáne Batys Afrıka elderinde taralýda. Búginde bul indet 5,4 myńnan astam adamnyń ómirin jalmady.
