Qazaqstanda Ebola vırýsynyń taralý qaýpi joq - Á.Mátishev
ASTANA. QazAqparat - Qazaqstanda Ebola qyzbasynyń tabıǵı oshaqtarynyń tamyr jaıýy jáne epıdemııalyq taralýy úshin eshqandaı jaǵdaılar joq. Bul týraly QR Ulttyq ekonomıka mınıstrligi Tutynýshylar quqyǵyn qorǵaý komıtetiniń tóraǵasy Álıaqpar Mátishev málim etti.
«Qazaqstanda Ebola qyzbasynyń tabıǵı oshaqtarynyń tamyr jaıýy jáne epıdemııalyq taralýy úshin eshqandaı jaǵdaılar joq. Eger qandaı da bir qaýip tóne qalsa, bizdiń medıtsınalyq mekemelerimiz vırýsty juqtyrǵan adamdy dereý anyqtap, ony oqshaýlap, emdeýge daıyn tur», - dedi ol elordalyq áýejaıda jýrnalısterge arnalyp jasalǵan baspasóz týrynda. Komıtet tóraǵasynyń aıtýynsha, elimizge shetelderden Ebola vırýsynyń kirip ketpeýin qamtamasyz etý úshin qajetti sanıtarlyq-epıdemııaǵa qarsy sharalar kesheni jasalǵan. Shekaralardaǵy barlyq ótkizý aýmaqtarynda sanıtarlyq-karantındik baqylaý kúsheıtilgen. «Jyl basynan beri Memlekettik shekaranyń ótkizý beketterinde 2 mln.-nan astam adam tekserilgen. Infektsııalyq aýrýlar juqtyrǵan adamdar kezdespedi», - dedi Á.Mátishev. Aıta keteıik, Dúnıejúzilik Densaýlyq Saqtaý Uıymynyń málimetteri boıynsha, 10 qazandaǵy jaǵdaı boıynsha Ebola vırýsyn juqtyrǵan 8399 adam tirkelgen. Olardyń 4033-i qaıtys boldy.
