Qazaqstanda EAEO memleketterine ruqsat etilmeıtin ónimderdi tasymaldaý tártibi naqtylandy
ASTANA. KAZINFORM – Arnaıy qujattar bolǵan jaǵdaıda ruqsat etilmeıtin ónimderdi EAEO elderine aparýǵa múmkindik bar. Bul jóninde QR QM Memlekettik kirister komıtetiniń Aýdıt departamenti, Eýrazııalyq ekonomıkalyq odaq sheńberinde qosylǵan qun salyǵyn ákimshilendirý basqarmasy basshysynyń orynbasary Baıdos Baıbozın tolyǵyraq aıtyp berdi.
Qazaqstan DSU-nyń tómendetilgen mólsherlemesi qoldanylǵan taýarlardy EAEO memleketterine aparýǵa jol bermeý jóninde mindetteme qabyldaǵany belgili. Sol sebepti, Alyp qoıý tizbesindegi ónimderdi atalǵan elderge tasymaldaý úshin birqatar qujattar bolýy tıis.
– Alyp qoıý tizbesindegi taýarlardy tasymaldaýǵa zańdy jol ashatyn eń basty qujat – elektrondyq shot-faktýranyń (EShF) qaǵaz kóshirmesi. Onda Memlekettik kirister komıtetiniń aýmaqtyq organynyń móri bolýy kerek, – dedi B. Baıbozın.
Sondaı-aq, onyń sózinshe, EShF-nyń qaǵaz kóshirmesimen birge tómendegi qujattardyń biri usynylýy shart:
• Úshinshi elderden Eýrazııalyq ekonomıkalyq odaqtyń Biryńǵaı kedendik tarıfi mólsherlemeleri boıynsha buryn ákelingen taýarlar tasymaldanǵan jaǵdaıda – Memlekettik kirister komıtetiniń aýmaqtyq organynyń mórimen kýálandyrylǵan kedendik deklaratsııanyń kóshirmesi;
• QR aýmaǵynda óndirilgen taýarlar tasymaldanǵan jaǵdaıda – TMD-daǵy taýarlardyń shyǵý elin aıqyndaý qaǵıdalary týraly kelisimniń ajyramas bóligi sanalatyn qaǵıdalarǵa sáıkes berilgen ST-1 nysanyndaǵy taýardyń shyǵý tegi týraly sertıfıkattyń túpnusqasy (Eýrazııalyq úkimetaralyq keńes sheshiminde ózgeshe kózdelmegen jaǵdaıda);
• Erkin ekonomıkalyq aımaqtar men erkin qoımalar aýmaǵynda óndirilgen taýarlar tasymaldanǵan jaǵdaıda – Qazaqstan Respýblıkasynyń zańnamasyna sáıkes berilgen ST-KZ nysanyndaǵy shyǵý tegi týraly sertıfıkattyń túpnusqasy nemese onyń «Atameken» QR Ulttyq kásipkerler palatasy kýálandyrǵan kóshirmesi;
• Basqa EAEO múshe memleketterden buryn ákelingen taýarlar tasymaldanǵan jaǵdaıda – taýarlardy ákelý jáne janama salyqtardy tóleý týraly ótinishtiń kóshirmesi (taýarlardy eksporttaý jáne ımporttaý, jumystardy oryndaý, qyzmetter kórsetý kezinde janama salyqtardy alý tártibi jáne olardyń tólenýin baqylaý tetigi týraly hattamaǵa sáıkes, Shartqa № 18 qosymsha).
Aıta keteıin, mundaı ereje 2015 jylǵy 16 qazandaǵy Býrabaı hattamasynda jáne Eýrazııalyq úkimetaralyq keńestiń 2016 jylǵy 12 tamyzdaǵy №5 sheshiminde kórsetilgen.
Al Alyp qoıý taýarlarynyń tizbesi Eýrazııalyq ekonomıkalyq komıssııa Keńesiniń 2015 jylǵy 14 qazandaǵy №59 sheshimimen bekitilgen.
Eske salaıyq, buǵan deıin taratqan aqparatta ST-1 sertıfıkatymen rastalatyn taýarlar tizbesinde 309 ónim bar ekeni jáne olardyń tolyq tizimin eec.eaeunion.org saıtynda kórýge bolatyny jóninde jazǵanbyz.