Qazaqstanda E.Konchalovskııdiń ınternatsıonalıst-jaýyngerler týraly fılminiń ekinshi kezeńi túsiriledi
ASTANA. Jeltoqsannyń 2-si. QazAqparat /Gúlmıra Álıakparova/ - Ataqty reseılik kınorejısser Egor Konchalovskıı Qazaqstanda Aýǵanstandaǵy áskerı qımyldarǵa qatysqan ınternatsıonalıst-jaýyngerler týraly kıno túsirýde. Fılmniń jelisi qazirgi zapastaǵy polkovnık Borıs Kerimbaevtyń aýǵannyń soǵys alańynda ótkizgen kúnderi negizinde túsirilýde,
dep habarlaıdy QazAqparat.
Stsenarıı boıynsha, fılmniń jumys ataýy «Naǵyz polkovnık - Qara maıor» dep atalady, al prokatqa ol «Aýǵandyq» atymen shyǵady dep boljanýda. «Qazaqfılm» kınostýdııasymen birlesken fılmniń alǵashqy kezeńi Almaty oblysynyń Sharyn shatqalynda túsirilip qoıǵan. Al aldaǵy kúnderi Qapshaǵaı mańyndaǵy taýlarda bastalatyn onyń ekinshi kezeńinde, áskerı qımyldardyń kórinisteri túsiriletin bolady.
B.Kerimbaevtyń atap ótkenindeı, kartınanyń negizgi ıdeıasy - aýǵan soǵysyna qazaqstandyqtardyń qatysýyn kórsetý.
«Kez-kelgen kınodaǵydaı onda mahabbat, soǵys, jaqsy men jaman bar. Fılmde qatygez «qara maıor» kórsetiledi. Shynynda men qatygez boldym, onsyz ol soǵystan az shyǵyndarmen shyǵý múmkin bolmaıtyn edi. Men Aýǵanstanǵa quramynda óńkeı barlaýshy-baskeserleri bar arnaıy jasaqtyń komandıri retinde kirdim. Biraq men ol soǵystan az shyǵynmen shyǵa aldym. Sol úshin de eki orden aldym - dep atap ótti ol.
