Qazaqstanda dzıýdoshylar klýby ashyldy
ASTANA. 18 shilde. QazAqparat - Qazaqstanda elimizdegi myqty dzıýdoshylardy biriktiretin «TAQ Astana Club» sporttyq klýby ashyldy. Bul týraly búgin Astanada ótken baspasóz máslıhatynda klýbtyń vıtse-prezıdenti Kıntal Islamov málim etti.
Klýb Tımýr Qulybaevtyń bastamasymen qurylyp otyr. Ataýyndaǵy «TAQ» áripteri de Tımýr Asqaruly Qulybaevtyń aty-jónindegi alǵashqy áripterdi bildiredi.
Komandanyń bas jattyqtyrýshysy KSRO sport sheberi, QR dzıýdodan eńbek sińirgen jattyqtyrýshysy Sergeı Rakovtyń aıtýynsha, klýbqa elimizdegi myqty dzıýdoshylar, atap aıtsaq, 2009 jylǵy Álem chempıony, 2011 jylǵy Álem Chempıonatynyń kúmis júldegeri Maksım Rakov, 2011 jylǵy Azııa oıyndarynyń kúmis júldegeri, 2011 jylǵy Azııa Chempıonatynyń kúmis júldegeri Islam Bozbaev, «World Masters» 2013 halyqaralyq týrnıriniń chempıony, 2012 jylǵy Azııa chempıony Sergeı Lım jáne 2013 jylǵy «Qazaqstan Barysy» týrnıriniń kúmis júldegeri, 2013 jylǵy Azııa chempıonatynyń kúmis júldegeri Erjan Shynkeev syndy sportshylar bar.
«Bulardyń barlyǵy bizdiń ulttyq quramamyzdyń músheleri bolyp tabylady. Kelesi jyly klýbtyń rezervin jasamaq oıymyz bar, sol úshin Qazaqstan chempıonatynda kózge túsken 10 sportshyny iriktep alamyz», - dep atap ótti S. Rakov.
Klýbtyń maqsaty týraly sóz qozǵaǵan vıtse-prezıdent Kıntal Islamov Olımpıada oıyndary men álemdik dodalarǵa daıyndalatyn dzıýdoshylar osy klýbpen tyǵyz baılanysty bolatynyn alǵa tartty. «Sportklýbtyń alǵa qoıǵan taǵy bir maqsaty dzıýdo mektebin ashý bolmaq. Oǵan Astananyń oqýshylary men stýdentteri qalaǵan ýaqytynda kele alatyn bolady», - dedi ol.
