Qazaqstanda Dúnıejúzilik banktiń ofısteri ashylady
ASTANA. QazAqparat - Búgin Parlament Senaty Qarjy jáne bıýdjet komıtetiniń keńeıtilgen otyrysy ótip, onda «Qazaqstan Respýblıkasynyń Úkimeti men Halyqaralyq Qaıta Qurý jáne Damý Banki arasyndaǵy Qazaqstan Respýblıkasynda ofıster qurý jáne olardyń jumys isteýi týraly kelisimdi ratıfıkatsııalaý týraly» zań jobasy talqylandy. Kelisimge 2016 jylǵy 21 qańtarda Davosta qol qoıylǵan.
Qujatqa sáıkes, Dúnıejúzilik bank Qazaqstanda ofısterge ıe bolyp, olardy operatsııalyq jáne ákimshilik qoldaý qyzmetterin kórsetý úshin qyzmetkerlermen jasaqtaıtyn bolady. Dúnıejúzilik bank qyzmetkerler men qyzmetshilerge jalaqy men basqa da shyǵystardy tolyq kólemde ózine alady. Banktiń ofısteri men úı-jaılaryna qol suǵylmaıdy jáne ol Dúnıejúzilik banktiń qaraýy men basqarýynda bolady.
Budan bólek, zań jobasy aıasynda Banktiń jáne onyń qyzmetkerleriniń ımmýnıtetteri aıqyndalyp otyr. Mundaı ımmýnıtet sot tóreliginiń qalypty iske asyrylýyna kedergi jasaıtyn bolsa, ol óziniń ımmýnıtetterin keri qaıtaryp alatyn bolady.
Tutastaı alǵanda, Kelisim 1994 jylǵy 23 mamyrdaǵy Almaty qalasynda turaqty ókildik qurý týraly shartty almastyrady. 2001 jyldan bastap, Dúnıejúzilik banktiń ókildigi Astanada jumys isteıtini, al, Almaty keńsesi osy qarjy ınstıtýtynyń Ortalyq Azııadaǵy aımaqtyq ókildigi mártebesin alǵany belgili.
Zań jobasy aldaǵy ýaqytta ótetin palatanyń jalpy otyrysyna shyǵarylatyn bolady.
