Qazaqstanda Dúnıejúzilik arterııalyq gıpertonııa kúni atalyp ótýde
Jıyndardyń maqsaty - halyqtyń atalǵan aýrýdy dıagnostıkalaý, emdeý men aldyn alý sharalary týraly habardarlyǵyn arttyrý.
«Halyqtyń arterııa gıpertonııasy týraly habardarlyǵynyń az bolýy atalǵan syrqattyń mańyzdylyǵyn durys baǵalamaýǵa, aýrýdyń alǵashqy kezeńinde, qaterli asqynýlardyń aldyn alýǵa múmkindik bar ýaqytta dárigerlik kómekke júginý kórsetkishiniń tómen bolýyna ákeledi»,-deıdi vedomstvo ókilderi.
Azamattardyń atalǵan aýrý týraly habardarlyǵyn arttyrý men onyń aldyn alý úshin respýblıka aımaqtarynda adamdar kóp jınalatyn jerlerde (azamattarǵa qyzmet kórsetý ortalyqtarynda, saýda úılerinde jáne t.b.) qandaǵy glıýkoza deńgeıin, arterııalyq qan qysymy men tamyr soǵysyn jáne dene salmaǵynyń ındeksin anyqtaý sharalary, sonymen qatar aqparattyq-aǵartý materıaldaryn taratý sharalaryn qamtıtyn aktsııalar ótedi. Munymen qosa, alǵashqy medıtsınalyq-sanıtarlyq kómek uıymdarynda (AMSK) kardıologtar, terapevter men nevropatologtardyń keńes berýi arqyly ashyq esik kúnderi ótedi.
Sonymen birge, AMSK medıtsınalyq qyzmetkerleri úshin arterııa gıpertonııasynyń profılaktıkasy máseleleri boıynsha oqytý semınarlary uıymdastyrylady. Arterııalyq gıpertonııaǵa baılanysty máselelerdi sheshýge qoǵam nazaryn aýdarý - arterııalyq gıpertonııanyń asqynýynan bolatyn júrek-qan tamyrlar júıesiniń aýrýlaryn tıimdi túrde aldyn alýǵa múmkindik beredi.