Qazaqstanda drondar 4 oblystyń aýmaǵynda poshta tasymaldap júr

ASTANA. QazAqparat - «Qazposhta» hat-habardy dronmen tasymaldaý baǵytyn jetildiredi. Bul týraly búgin «Tsıfrlyq Qazaqstan» baǵdarlamasyn júzege asyrýǵa arnalǵan konferentsııada «Qazposhta» AQ Transformatsııa jáne IT jónindegi basqarýshy dırektory Narıman Muqyshev málim etti, dep habarlaıdy QazAqparat.

«Bizdegi negizgi jobalarǵa toqtalatyn bolsam, birinshiden, biz drondardy ushyrdyq. Qazirgi kezde 10 dron 4 oblystyń aýmaǵynda ushyp júr. Bul óz kezeginde «Tsıfrlyq Qazaqstan» baǵdarlamasymen júzege asyryp jatqan sharalardyń biri. Atap aıtqanda, biz osy joba aıasynda júkti jetkizý ýaqytyn qysqartyp otyrmyz. Keıbir aýyldy jerlerge kólikpen jetý qıyndyq týǵyza. Bul rette dronmen hat-habardy ońaı baǵyttaı alamyz», - dedi N. Muqyshev.

Onyń sózine qaraǵanda, poshtany dronmen jetkizý jobasy ózin aqtap keledi. Belgili bolǵandaı Qazposhta 1,5 tonna bolatyn hat-habardy dron arqyly tasymaldady.

«Biz bul baǵytta ary qaraı damytpaqpyz. Sebebi bul sala tehnologııa men ishki operatsııalyq sharalardy jetildirýde mańyzdy ári qyzyqty bastama», - dedi Narıman Muqyshev.

Eske sala ketsek, ótken jyldyń qyrkúıek aıynda eki kelige deıin júk kóteretin poshtalyq drondar ushyrylǵan edi. 

Foto:  «Qazposhta» AQ baspasóz qyzmeti