Qazaqstanda dopıngpen kúrestiń kúsheıtilgen sharalary zańda jazylady
ASTANA. QazAqparat - QR Mádenıet jáne sport mınıstrligi el Úkimetine sportta dopıng qoldanýmen kúreske baǵyttalǵan sharalar naqty kórsetilgen zań jobasyn usynatyn bolady, dep habarlaıdy QazAqparat.
«Qazirgi ýaqytta dopıng qoldanǵany úshin jaza sharalaryn qatańdatý boıynsha álemdik tájirıbeni zerdeleý jumystary júrgizilip jatyr. Olar aldaǵy ýaqytta Qazaqstan Respýblıkasynda da qoldanylýy múmkin. Mınıstrlik barlyq is-sharalardy júrgizgennen keıin Úkimetke «Dene tárbıesi jáne sport týraly» QR Zańyna sportta dopıng qoldanýdy tyıý sharalaryn kúsheıtýge qatysty ózgerister engizý týraly bastamamen shyǵady», - dep habarlady mınıstrliktiń baspasóz qyzmetinen.
Aıta keterligi, buǵan deıin Fox Sports telearnasy dopıng qoldanǵany úshin 2008 jáne 2012 jylǵy Olımpıada oıyndarynyń medalinen aıyrylǵan sportshylar týraly málimetterdi jarııa etken bolatyn. Atalǵan tizimde Qazaqstan 2-shi orynda tur. Óıtkeni, Halyqaralyq olımpıada komıteti Qazaqstannyń 9 sportshysyn medalinen aıyrǵan. Kósh basynda 19 sporshysy dopıng daýyna ilikken Reseı tur. Al 7 nagradadan qaǵylǵan Belarýs úshinshi orynda.
Mundaı daý-damaıǵa qaramastan Qazaqstan sportshylary bıylǵy Rıo olımpıadasynda tamasha óner kórsetti dep aıta alamyz. Jalpy, Rıo-de-Janeırodaǵy 31-shi jazǵy Olımpıada oıyndarynda Qazaqstan quramasy 22-shi orynǵa turaqtady. Qazaqstan sportshylary 17 medal utyp aldy. Onyń ishinde Nıdjat Rahımov (aýyr atletıka), Dmıtrıı Balandın (júzý), Danııar Eleýsinov (boks) altyn medal aldy. Eldos Smetov (dzıýdo), Jazıra Japparqul (aýyr atletıka), boksshylar Vasılıı Levıt, Ádilbek Nııazymbetov, Gýzel Manıýrova (áıelder kúresi) kúmis medalmen qanjyǵalaryn maılady. Qola medal Otgontsetseg Galbadrah (dzıýdo), aýyr atletter Farhad Harkı, Karına Gorıcheva, Aleksandr Zaıchıkov, jeńil atlet Olga Rypakova, palýandar Elmıra Syzdyqova, Ekaterına Larıonova, boksshylar Ivan Dychko, Darıga Shakımovalarǵa buıyrdy.
